Mga bag-o sa 5th Cebu Doctors' University Run

CEBU, Philippines - Magsingko anyos na ning tuiga ang University Run nga gipasiugdahan sa Cebu Doctors' University (CDU) ug ning panahona, ang organizers mopasiugda og   pipila ka "firsts" sa esena sa lumba sa dagan dinhi sa Sugbu karong Agosto 15 diha sa CDU grounds sa Mandaue City.

Una, tingali mao kini ang unang higayon, dili lamang dinhi sa Sugbu kun dili lukop nasud nga ang kalihukan mogawi og personalized race bib inay sa naandan nga number race bib. Sa pagka karon, gitanyag lang kini ngadto sa unang 500 registrants sa dihang gipahibalo kini sa organizers atol sa press conference didto sa Pino Restaurant sa Brgy. Lahug niadtong miaging gabii.

Si Dr. Yong Larrazabal, ang forerunner sa University Run ug sa Run For Sight Foundation, miingon nga sa naandan nga international events, ang personalized race bibs magamit lang sa elite runners, dinhi sa Sugbu, ang matag usa makahigayon pag-angkon niini    pinaagi sa first-come-first serve basis.

Lain pang "first" mao nga ang matag bib, magsilbe usab nga "stub" alang sa snack, bottled water ug uban pang samplings gikan sa ilang sponsors diha sa finish line aron pagseguro nga hapsay ang dagan sa lumba.

Si CDU president Dr. Potenciano Larrazabal Jr., nagkanayon nga mao sab kini ang labing una nga ang lumba gilakip sa regular events sa tinuig nga Intramurals sa ilang unibersidad. Ang matag tinun-an makadawat og correspondent point depende sa ilang placing sa kategoriya nga ilang giapilan -- 10K, 5K o 3K. Ang point nga ilang makuha dakung matabang sa ilang department's overall standings sa Intramurals.

Mao sab kini ang unang higayon nga ang Smart Communications, Nature Valley Crunchy Granola ug HSBC nalambigit sa kalihukan.

Ganting salapi, medalya ug uban pa ang ihatag ngadto sa top performers.

Ang registration nagkantidad og P250 alang sa regular runners ug P200 alang sa mga estudyante. Ang entry forms mahimong makuha sa CDU main campus, Sight First Clinic sa Cebu Doctors Hospital ug sa Cebu City Sports Center. (BANAT NEWS)