25K International Marathon gipanalipdan sa PATAFA

CEBU, Philippines - Adunay lig-ong katimbang ang organizers sa 25K International Marathon dihang    nakakuha sila'g suporta gikan sa Philippine Amateur Track and Field Association (PATAFA).

Si Joey Santos, ang road race measurement and timer sa PATAFA ang mituyo gyud pag-anhi sa Sugbu ug mitambong sa press conference nga gipangulohan ni IPI promotion manager Angel Dela Merced ug race director Joe Deresas niadtong Biyernes sa gabii diha sa Sports Exchange Bar sa Mango Avenue.

Ang International Pharmaceuticals Incorporated (IPI) nga maoy nipasiugda sa lumba mihangyo ni Santos nga i-sanctioned ang ilang lumba aron mamahimo kining lehitimo atubangan sa mga pagsaway sa ubang running groups.

Si Santos midepensa usab sa 25K International Marathon ug giila niya kini nga usa ka marathon tungod kay sa international marathon, dili lang ang 42k full-marathon ang mahimong tawgon nga marathon, lakip na usab niini ang mga lumba sa 25K, 30K, 50K ngadto sa 100K ultra marathon.

Nagubot karon ang kalibutan sa Cebu running dihang gidungan ang petsa sa 25K International Marathon ug sa tinuig nga Cebu Doctors' University (CDU) University Run karong Agosto 15 sa managlahing binyu.

Wala tuyoa ni Dela Merced nga magkadungan ang petsa ug wala usab siya'y nakita nga dautan sa pagpahigayon tungod kay ang 25K International Marathon anhi sa Sugbu ipahigayon, samtang ang CDU University Run adto sa dakbayan sa Mandaue. (BANAT NEWS)