Canillas mipaundang ni Mendoza sa rd.2

CEBU, Philippines - Duha lang ka rounds ang gikinahanglan sa ALA Boy nga si Larry “BonJovi” Canillas aron paundangon ang taga-Manila nga si Dexter Mendoza sa ilang sangka sa main event sa “Best of Boxing 1” niadtong miaging gabii diha sa Mandaue City Sports and Cultural Complex.

Nagpungasi nga one-two combination ang daling gibuhian ni Canillas ngadto ni Mendoza kinsa tataw kaayo nga gisakitan sa mga tirada sa ALA Boy sa iyang ulo ug lawas. Wala na dugaya pa ni Canillas ang away human siya mibuhi og laing kombinasyon nga gitapos sa usa ka naghagurus nga right hook sa lawas nga maoy mipahagsa ni Mendoza sa nahibiling 1:25 sa round 2.

Sa supporting main event, gipamatud-an ni Jayson Rotoni ang iyang abilidad human siya midaog pinaagi sa technical decision batok sa taga-Tagbilaran nga si Arnel Tadena.

Init ang sinukliay og kinumo tali sa duha ka boksidor sulod sa upat ka round, apan gihunong sa referee ang away sa katapusang 1:10 sa fifth round human makahiagum og dakung gisi sa tuong kilay si Tadena. Tungod niini, ang mga hurado midangop ngadto sa scorecard diin naglabaw si Rotoni, 49-46. 49-46 ug 50-45.

Midaog usab si Mark Jason Taroja batok sa beteranong si Jojo Intor pinaagi sa fourth round technical decision. Sama sa sangka nila ni Rotoni ug Tadena, usa ka accidental headbutt nga miresulta sa pagkagisi sa kilay ni Intor ang mitapos sa away. Usa ka hurado ang miiskor og 39-37 alang ni Intor, samtang duha ka hurado ang miiskor og 39-37 alang ni Taroja.

Ang taga-Barili nga si Rolito Gasco midesisyon usab ni Jessie Albaracin sa Tony Dacer Stable of Davao City. Bisan paman og gikuhaan siya og puntos tungod sa low-blow, padayon gihapon si Gasca sa pagkulata ni Albaracin. Human sa sangka tulo ka mga hurado ang miiskor og 96-93, 95-94 ug 97-92 alang ni Gasca.

Si Markjhun Makahilig sa Kalibo, Aklan midaog usab pinaagi sa unanimous decision batok ni Elbert Guardiario sa Tony Dacer Stabe, samtang wala usab musalir si Jamjam Ungon dihang gilumsan siya og kinumo ni Joy Pol ug si Jicky Gaco sa Boljoon mipahunong usab ni Carlito Solante sa Bohol pinaagi sa TKO sa 1:24 sa opening round. –  BANAT NEWS