Buwaran daog sa Brgy. Sawang Calero Inter-sitio

CEBU, Philippines - Nagkayong opensa ang gigamit nga hinagiban sa   Block-7 Buwaran paglubong sa Strollers, 107-97 alang sa ikaduha nilang daog sa juniors division sa Brgy. Sawang Calero Inter-Sitio basketball league didto sa San Nicolas Sports Complex.

Sa unang singko minutos sa duwa, mirehistro dayo'g 12 puntos nga labaw ang Block-7 sa iskor nga 16-4.

Si Tiongson mihimo'g 19 puntos sa unang-duha ka kuwarter aron hatagan ang Buwaran og nuybe puntos nga bentaha sa halftime, 62-53 .

Mikumbate hinuon ang Strollers sa sunod nga kuwarter pinaagi sa ilang fastbreak plays sa pagpangulo nilang Edward ug Marvin Cuyno, apan wala kini makasikit sa iskor kay dali usab nga gipabugnaw ang ilang kainit sa Buwaran pinaagi sa ilang nagtusaktusak nga 3-point shots.

Nakasugat og gamay'ng problema ang Buwaran sa 7:02 sa final period dihang nabutang sa foul-trouble si Tiongson, apan dali usab siyang gitubos ni Dodong Cabanes.

Si Tiongson mirehistro og career-high 34 puntos, gisundan ni Cabanes nga adunay 27 puntos, lakip na ang usa ka tres ug duha ka lay-ups sa katapusang 54 segundos alang sa otso puntos nilang labaw, 103-95.

Ang naparot nga Strollers gipangulohan ni Edward ug Marvin kinsa mi-iskor og 24 ug 21 puntos matag usa.

PUNTOS MATAG USA

Buwaran (107) - Tiongson 34, Cabanes 27, Magno 15, Espina 10, Cenabre, 8, Toto 8, Anot 5

Strollers (97) - E. Cuyno 24, M. Cuyno 21, Delos Reyes 16, Bufe 10, Bagias 10, Nosbel 7, Onie 4   (BANATNEWS)