Team Froilan sud semis sa Jiboren's Cup

CEBU, Philippines - Nakakuha na og pasaporte sa semifinal ang Team Froilan human gipilde ang University of San Carlos (USC) belles sa 1st Sinulog Jiboren's Cup Volleyball Open niadtong Domingo diha sa Pasil Sports Complex, ning siyudad.

Ang Team Froilan, mipukan sa USC sa kulbahinam nga duwa sa duha ka sets, 25-23, 25-22 aron magpabiling walay pilde sa upat ka duwa sa women's division.

Ang kadaugan sa Team Froilan gipangulohan nilang four-time Nestea beach volley national champion Florian Guttierez, uban ni kanhi University of San Jose-Recoletos (USJ-R) stalwarts Cheche Bohol, Genie Sabas, Marissa Lagancia, Mechell Matugina ug Cebu Sports Hall of Famer coach Grace Antigua, kinsa niduwa isip ilang setter.

Dili hinuon ikamahay ang kapildihan sa USC kay sama Team Froilan, nakakuha sab kini og lingkoranan sa semis uban sa University of Southern Philippines Foundation's collegiate ug secondary squads.

Sa men's bracket, ang University of Southern Philippines Foundation (USPF) mikopya sab sa kalampusan sa ilang women's squad ug miabante kini sa semis pinaagi sa pagpilde sa Team Saiha, 25-19, 25-22.

Laing nakasud sa semis mao ang Dindo Salon Exclusivz ug John Patrick Caylo (JPC) All Stars.

Ang 1st Sinulog Jiboren's Cup Volleyball Open kabahin sa kasaulogan sa kapistahan sa Barangay Pasil pahinungod sa Batang Hesus, Señor Sto. Niño ning bulana. – BANAT NEWS