5th Inter BPO caging Aegis People Support abante na sa semis

CEBU, Philippines - Hingpit na nga naangkon sa Aegis People Support ang bakanteng luna sa semis human nila gipilde ang susama nila'g kalidad Eperformax, 41-35 sa quaterfinals sa 5th Inter BPO basketball championship niadtong Domingo diha sa City Sports Club-Cebu gym sa Cebu Business Park.

Ang Aegis nga nakabaton og twice-to-beat advantage sa quarterfinals napilde sa una nilang engkuwentro, 63-51 niadtong Sabado. 

Sa tuyo nga makabangon, ang Aegis miambo ug mipatuman sa ilang solidong depensa sa pag-alkontra sa opensiba sa Eperformax aron maangkon ang mahinungdanong kadaugan.

Si Philip George Carabuena maoy topscorer sa Aegis kinsa mipupo og 12 puntos, gisundan ni Cedric Caballero nga miabuno og 10 puntos.

Ang natagak nga Eperformax gipangulohan sab ni Justin Arrieta, kinsa misansan og 13 puntos.

Ang Aegis moharong sunod sa two-time champions Convergys sa "best-of-three" semifinals ubos sa Bracket-A.

Sa laing bahin, ang e-Telecare mipukan sab sa defending champion Teletech Titans sa iskor nga 68-61 sa pagsugod sa ilang kaugalingon "best-of-three" semifinal series sa Bracket-A.

Si Gilbeys Cabrera miburak og 17 puntos, samtang si Benjie Mancao mibugha og 11 puntos alang sa e-Telecare, kinsa nagkinahanglan na lang og usa ka daog aron makuha ang pasaporte alang sa kampiyonato.

Si Laurenz Limpangog mirehistro og game-high 23 puntos, samtang si Shem Banua midugang og 13 puntos alang sa maong kapildihan.

Puntos Matag Usa

Unang duwa:

e-Telecare (68) - Cabrera 17, Mancao 11, Basto 9, Adolfo 8, Burgos 6, Mangubat 6, Mercader 6, Ampong 5

Teletech (61) - Limpangog 23, Banua 13, Clemente 6, Ampong 5, Abellanosa 5, Abordonado 5, Sultan 4, Mata 3, Cubero 2

Ikaduhang duwa:

Aegis People Support (41) - Carabuena 12, Caballero 10, Nayon 9, Cabrera 6, Ylaya 3, Gamallo 1

Eperformax (35) - Arrieta 13, Tan 8, Agua 4, Gabisay 3, Sayre 3, Nebria 2, Visoc 2. -Yoyo R. Abayan (BANAT NEWS)