Rollyr Boyz misakmit korona sa FYA caging

CEBU, Philippines - Balanse nga opensa maoy gihimong hinagiban sa Rollyr Boyz pagpukan sa Kuya Allan, 94-85 aron langkaton ang korona sa F. Llamas Youth Association (FYA) 1st Vice Mayor Mike Rama Cup basketball tournament niadtong miaging gabii didto sa Vicente Sotto Memorial Gym sa barangay Punta Princesa, ning siyudad.

Ang Rollyr Boyz ni team owner Punta Princesa barangay captain Rolly Diorico mikulit dayon og 12 puntos nga bentaha, apan gipapas kini sa Kuya Allan didto sa sayong bahin sa third period ug misikit ngadto sa 45-47 pinaagi sa three-point shot ni Noel Medalle.

 Wala hinuon molampos ang Kuya Allan sa ilang laraw pagsakmit sa labaw tungod kay si Ranel Patalita wala maka-iskor sa kinatibuk-ang third period, samtang si Kenneth Marquida napugngan lang ngadto sa singko puntos.

Si Crissar Llegunas, gidepensaan og maayo sa third period, apan nakamaneho gihapon pag-iskor og 17 puntos alang sa Rollyr Boyz aron pagdaog sa MVP trophy. Si Daniel Enriquez mikutlo sab og 17 puntos, gisundan ni Dexter Caballero nga adunay 16 puntos.

Sila si Llegunas, Patalita ug Caballero naapil sab ngadto sa Mythical Five uban nilang Adrian Laborte ug Dondon Cadungog.

Sila si Medalle ug Marquida maoy topscorers sa Kuya Allan nga adunay 20 puntos matag usa. 
Sa sayo pa, ang Heartfelt mibuntog sa Grandeur, 95-93 aron pagsakmit sa ikatulong dapit. 
Si Adrian Laborte maoy nangu sa Heartfelt pinaagi sa iyang 32 puntos, samtang si Dodong Cabigas miabuno og 22 puntos.

Si Ryan Villaver maoy gitunolan sa sportsmanship award

gikan sa mga opisyales sa FYA pinangulohan sa ilang presidente nga si Arnel Trinidad. Mitunol sa mga tropeyo ug ganting salapi ngadto sa mga mananaog mao si tournament director nga si Boy Atillo sa ngan ni Brgy. Capt. Diorico ug barangay councilor Ray Gabriel Salgado.

Puntos Matag Usa

Unang duwa:

Heartfelt (95) - Laborte 32, Cabigas 22, Danding 17, N. Laborte 9, Abella 4, Densing 4, Alob 2, Arreglo 2

Grandeur (92) - Cadungog 18, Tabar 16, Tundag 16, Atuel 16, Dacayana 12, Guy 5, Lañojan 4, Sabalande 4  
Ikaduhang duwa:

Rollyr Boyz (94) - Llegunas 17, D. Enriquez 17, Caballero 16, Dela Cerna 10, Basalo 8, E. Marata 8, T. Marata 8, Lantaka 6, J. Enriquez 4

Kuya Allan (85) - Marquida 20, Medalle 20, Reubal 13, Rabadon 9, Patalita 8, Lastimosa 5, Quieta 5, Solon 3, Canceko 2 . – BANAT NEWS