Mambaling nanghawod sa MLKP dancesports

CEBU, Philippines – Ang team Mambaling maoy nakaangkon sa titulo nga labing gamhanang koponan sa 2008-2009 Go Ching Hai-Martina Cup and ML Kwarta Padala Cup Dancesports and Hip-Hop Competition Grand Championships diha sa Atillo Gym sa barangay Punta Princesa, ning siyudad.

Wala hinuoy grand champion nga gideklara, apan basi sa mga medalya nga nadaog, ang Mambaling maoy kinadaghanang medalya nga nahakot nga adunay upat ka golds ug walo ka silvers.

Ang Mambaling mikabkab og duha ka bulawan ug tulo ka silvers gikan sa open routine figure ug ang uban gikan na sa closed standard.

Ang duha ka bulawan nga nakuha naggikan nilang Dexter Quijote ug Sharmaine Maloloy-on, kinsa nanghawod sa closed standard ug open latin youth division. Ang laing duha ka bulawan naggikan nilang Adrean Veraces ug Guilla Calumba sa closed standard junior category ug nilang Jason Milla ug Katherine Palelio sa open junior latin division.

Mi-okupar sa ikaduha nga dapit ang Cogon-Ramos sa ilang tulo ka golds ug duha ka bronzes, samtang ang Lahug maoy mikapyot sa ikatulo nga dapit nga misilsil og duha ka golds ug tulo ka bronzes.

Ang bulawan nga nahipos sa Cogon-Ramos naggikan nilang Durrel Intong ug Therese Quilaton sa closed latin ug standard juvenile class ug nilang Patrick ug Therese Andre Quilaton sa open standard juvenile.

Mitunol og bulawan sa Lahug mao sila si Robert Alinabon ug Joana Casibo sa closed latin junior class ug nilang Jordan Taborada ug Sheila Marie Dono sa latin open youth class.

Ang Tejero ug Pasil nagsawo sa ikaupat nga dapit nga parehong nagbitbit og usa ka gold ug usa sab ka bronze.

Sila si John Paul Mocorro ug Annaly Suazo maoy mitunol og bulawan ngadto sa Tejero human manghawod sa open latin juvenile, samtang sila si Sean Philip Piner ug Deysiree Nanca mao sab ang mihatag og bugtong bulawan ngadto sa Pasil kortesiya sa open standard junior class. – BANAT NEWS