Inter Call Center-BPO Indoor Games mosikad karong hapon

CEBU, Philippines – Adunay kinatibuk-ang 110 ka mga kawani gikan sa nagkalain-laing Call Centers ug Business Outsource Processing Companies dinhi sa Sugbu ang mopakita sa ilang abilidad sa 1st Phat Thursday-Y101 Inter-Call Center and BOP Indoor Games nga mosikad karong alas-2:30 sa hapon diha sa Phat Thursday Resto Restaurant and Sports Bar sa Banilad Town Center (BTC).

Ang mga teams gikan sa Calltek, Sykes, People Support, 1 and 1 Internet Philippines, Convergys ug eTelecare ang magtigi sa usa ka bulan nga kompetisyon.

Gidasig sa organizers ang ubang call centers ug BPO companies sama sa ePerformax, WiPro, ICT, Qualfon, Western Wats, PhilWeb, Teletech, Voiceville, Trax UG Exist Global sa pagsalmot.

Mga duwa nga tigian mao ang Women’s 9-ball ug chess alang sa individual event, samtang ang teams events naglakip sa billiard ug darts nga langkuban og upat ka male ug usa ka female members o all-female team.

Alang sa dugang mga kasayoran, mahimong motawag sa (032) 316-0035. – BANAT NEWS