USP-F abante semifinal sa Wagas Cup

CEBU, Philippines – Gipukan sa defending CESAFI women's volleyball champion University of Southern Philippines-Foundation (USPF) ang University of San Jose-Recoletos (USJ-R) sa straight sets aron pag-abante sa semifinal round sa 2nd Mayor Ritchie Wagas Volleyball Cup niadtong miaging adlaw didto sa D.M. Reyes gymnasium sa Compostela, Cebu.

Ang USPF ni coach Jordan Paca naglisod sa unang set ug igo lang kini midaog og dos puntos, 28-26, apan mihimo sila'g kausaban sa sunod nga set aron pahamtangan ang USJ-R og 22-18 nga kapildihan.

Ang kapildihan nakapangitngit sa paglaum sa USJ-R nga moabante sa sunod hugna ning maong kompetisyon.

Mitimon sa kadaugan sa USPF mao sila si reigning Nestea Fit Beach Volley National Champions Erika Camille Verano ug Apple Saraum.

Apan ang ilang high school squad wala buligi og swerte dihang miyukbo kini ngadto sa Team Froilan sud sa duha ka sets, 25-20, 25-19.

Sa laing bahin, ang walay pildeng Southwestern University (SWU) ni coach Joerem Yu mirehistro sa ilang ikaupat nga sunod-sunod nga daog gikan sa mga kamot sa Team Housing, 25-8, 25-6.

Gawas sa mga medalya ug tropeyo, ang makampiyon makadawat og P15,000 nga ganting salapi, ang mopahiluna sa ikaduha makaangkon og P10,000, samtang ang ikatulo mobulsa og P5,000.

Ang maong kalihukan usa sa mga highlights sa tinuig nga kapistahan sa Compostela karong Hulyo 24-25 agi'g pasidungog sa ilang mahal nga patron Señor Santiago de Apostol. – Yoyo R. Abayan (BANAT NEWS)