SCSIT morepresentar na sab sa Sugbu

CEBU, Philippines – Ang Salazar Colleges of Science and Institute of Technology (SCSIT) subli na sab nga morepresentar sa Sugbu alang sa National Open Softball Championships nga gikatakda karong Mayo 30 hangtod sa Hunyo 5.

Sa miaing tuig, ang mga Sugbuanong atleta gikatag sa nagkadaiyang teams tungod kay gilimitahan lamang ang gidaghanon sa national players nga niduwa sa matag koponan.

Ning higayona, ang organizers nakahukom nga ang usa ka team mahimo na nga mopaduwa og daghang kanhi ug kasamtangang sakop sa nasudnong koponan.

Ang SCSIT adunay tulo ka aktibong sakop RP team nga sila si Francisco Ramirez, Darios ug Roldan Bacarisas. Abagan sila sa mga

sakop kanhi sa RP team sama nilang Rolly Bacarisas, Manuel Bacarisas ug Zacky Bacarisas.

Ang ubang mga banggiitang magdudula, kinsa moduwa sa SCSIT delegation nga gipaluyohan ni Engr. Doroteo M. Salazar naglakip nila ni Sherwin Fernandez, Sherwin Tabar, Genero Macayan, Jesser Casia, Marvin Ngujo, John Magno, Jackson Genolaga, Abrin Pautan, Alinton Adolfo ug playing coach Zacarias 'Isyot' Bacarisas. – BANAT NEWS