Cyber Knights midemolis sa SRBC sa 1st MLKP Cup caging

CEBU, Philippines – Gidemolis sa Asian College of Technology (ACT) Cyber Knights ang San Remigio Beach Club, 52-40 aron mag-solo sa ikaduhang dapit sa liderato sa 1st M. Lhuillier Kwarta Padala Cup basketball tournament didto sa Suba-Pasil Sports Complex.

Kontrolado sa ACT Cyber Knights ni coach Tata Merced ang duwa sukad makabaton og otso puntos nga bentaha sa halftime sa iskor nga 25-17.

Ang walay kukaluoy nga ACT Cyber Knights padayong mipatuasik sa ilang opensiba aron pag-ayag og 12 puntos nga kadaugan.

Sa laing aksiyon, ang Binglens milampurnas sa Perfect Freight sa iskor nga 97-91 aron makigsawo uban sa Chazyl Mae sa ikatulong dapit sa overall standings sa managsamang 4-2 win-loss records.

Si Jessie Lumantas mipabuto og 28 puntos, samtang si Alain Abellanosa midiskarga og 24 puntos alang sa Binglens, kinsa nabitin og siyete puntos paghuman sa unang 10 minutos sa duwa, 22-29. Apan ang Binglens mihimo og makabangog nga 26-9 run sa ikaduhang kuwarter aron mailog ang labaw, 48-38 sa halftime.

Si Marvin Mercado miamot og 16 puntos alang sa Binglens, gisundan ni Max Delantes nga mitampo og 12 puntos.

Ang makampiyon sa maong liga nga gipasiugdahan sa M. Lhuillier pinaagi sa ilang marketing director Michael 'Mike' Roma, mobulsa og P50,000. Ang mopahiluna sa ikaduha makaangkon og P30,000, ang ikatulo makadawat og P15,000, samtang ang ikaupat adunay consolation prize nga P5,000.

Puntos Matag Usa

Unang duwa:

Binglens (97) - Lumantas 28, Abellanosa 24, Mercado 16, Delantas 12, Tagapan 6, Canceran 5, Abella 4, Abellar 2

Perfect Freight (91) - Cantonao 27, Sahilan 14, Filoteo 14, Canoy 14, Balansang 10, Escudero 9, Miro 3

Ikaduhang duwa:

ACT (52) - Nuñez 16, Aparice 14, Batiancila 6, Doy 5, Reyes 5, Unahap 2, Montes 2, Valencia 2

SRBC (40) - Mercader 10, Espina 7, Premacio 7, Broson 7, Alano 7, Auditor 2 – BANAT NEWS