2nd Senator Zubiri National Rodeo Cup

CEBU, Philippines - Mag-abot na sab dinhi sa Sugbu ang mga bantugan ug ang mga umaabot nga cowboys sa nasud   alang sa 2nd Senator Juan Miguel F. Zubiri National Rodeo Finals nga gikatakda karong Abril 25-26 diha sa Mandaue Rodeo Arena nga nahimutang sa Parkmall sa north reclamation area.

Mga professional players gikan sa nabantog nga rodeo teams lukop nasud ang moduwa ug mopakita sa tanan nilang abilidad.

Dul-an sa tunga ka milyones pisos ang ihatag ngadto sa top performers ning duha ka adlaw nga kompetisyon.

Sa non-cattle division, ang kampiyon sa load carrying mobulsa og P15,000, ang second placer makadawat og P10,000 ug ang third placer makaangkon og P5,000. Sa tug of war, ang kampiyon makadawat og P15,000, ang first runner up makaangkon og P9,000 ug ang 2nd runner up gantihan og P6,000.

Sa cattle category, ang kampiyon makaangkon og P15,000, samtang ang second ug third placers makadawat og P10,000 ug P5,000. Mao sab nga ganti ang ihatag ngadto sa nag-unang tulo sa lassoing on foot.

Ang best entry sa rop and tie mobulsa og P20,000, ang second player makadaog og P15,000 ug ang third placer makadawat og P10,000.

Sa team roping, ang top three winners makadawat og P25,000, P20,000 ug P15,000.

Ang nag-unang tulo ka mananaog sa carambola makadawat og P20,000, P15,000 ug P10,000, samtang ang top three sa calf makadaog og P15,000, P10,000 ug P5,000.

Ang palarang mananaog sa calf undecorating makadawat og P60,000, samtang ang rodeo king ug queen mobulsa og P10,000 matag usa.

Ang registration fee nagkantidad og P2,000. Ang tanang koponan kinahanglan nga mopadayag sa ilang intensyon sa pagsalmot sa Rodeo Committee. Ang mga koponan lang nga nipadala sa ilang kompirmasyon ang tugotan nga makaduwa.

Ang rodeo show nga gipasiugdahan sa Filipinas Rodeo Federation Inc. (FRFI) ubos sa liderato sa ilang presidente nga si Maryo T. Okinlay, gipaluyohan sa probinsiya sa Sugbu sa pagpangulo ni Governor Gwendolyn ‘Gwen’ Garcia ug sa kagamhanan sa dakbayan sa Mandaue ubos sa liderato ni Mayor Jonas Cortes.

Ubang mga opisyales sa FRFI naglakip nilang Noel Basubas (vice president), Mayor Bernard ‘Butch’ Sepulveda (treasurer), Anton Quisumbing (secretary) ug mga sakop sa Board of Directors nga sila si Neal de la Cerna, Jose Miguel S. Fortich ug Michael Siao.   (BANAT NEWS)