Fight Night boxing tour sugdan Sept. 20

CEBU -  Makapaukyab nga sinukliay og kumo ang modagsa sa mga dagkung siyudad sa Kabisay-an ug Mindanao sa ipahigayong Summit Natural Drinking Water “Fight Night” Boxing Tour.

Ang kulbaniham nga engkuwentro motay-og sa mga boxing stadiums matag tuig sugod karong Septiyembre 20 diha sa Mandaue City Plaza Square.

Si kanhi World Boxing Council (WBC) flyweight champion Malcolm ‘Eagle Eye’ Tuñacao moharong ni RP No. 2 Monico Laurente alang sa bakanteng Philippine bantamweight championship.

Si Tuñacao, usa sa orihinal nga “Golden Boys” sa Cebu Boxing, nakaangkon og talagsaong dungog niadtong 2000 nga maoy bugtong Filipino world champion sa maong tuig dihang iyang gikulata si Medgoen Singsuraf aron pag-angkon sa korona sa WBC 112-pound.

Usa ka tuig human milaylo sa paugnat sa kusog aron maalim sa hingpit ang iyang wrist injury, mibalik kini sa pamuksing niadtong Mayo ug midaog kini pinaagi sa first round TKO batok ni Tanzanian warrior Rashid Ally didto sa Waterfront Cebu City Hotel and Casino sa barangay Lahug, ning siyudad.

Sa laing bahin, si Laurente naggikan sa nabantog nga stable ni Hall-of-Famer Gabriel ‘Flash’ Elorde sa Parañaque City.

Misaka siya aron mamahimong ikaduhang top warriors sa nasud sa 118-pound division sud lang sa tulo ka tuig. Napakyas siya sa makaduha ka higayon paglangkat sa regional belt ug gumikan niini ang iyang pakigharong batok ni Tuñacao maoy iyang higayon aron maangkon ang titulo.

Sa undercards, si Albert Villacampa sa Bantayan Island makigsinukliay og kumo batok ni Loloy de la Peña sa Lapu-Lapu City, samtang laing taga isla sa Bantayan nga si lightweight Joel ‘Yao Ming’ Zaspa mosubo sa abilidad ni Janlee Paingol sa Gov. Yebes Stable sa Dipolog City.

Si Leo Torres sa Eastern Samar mopakita sa iyang abilidad batok ni Powell Balaba sa Tagbilaran City, si Ronilo Lawis sa San Miguel, Bohol makigsambunot ni Ramil Cabalan sa DBP Stable sa Butuan City ug si super bantamweight Larry ‘Bonjovi’ Canillas sa Toledo City makigsangka batok ni Andelo Adajar sa DBP Stable sa Butuan City.

Ang tour series gipasiugdahan sa ALA Promotions sa abag sa Summit Natural Drinking Water ug sa kagamhanan sa dakbayan sa Mandaue.

Ang tour moduaw sab ngadto sa Cagayan de Oro, Davao, Tagbilaran, Bacolod ug sa ubang mga dapit sa lalawigan sa Sugbu. (BANAT NEWS)