Atan Guardo milansang na sab og daog, gipilde ang Espongklong

Naibtan og tunok ang Atan Guardo human sa ilang makutas nga kadaugan batok sa Espongklong, 85-84 sa basketball event sa 2008 Sambag I Summer Sports League didto sa Sambag I Sports Complex, ning siyudad.

Sikit ug init kaayo ang kumbati gikan sa pagsugod hangtod nga nahuman diin ang team nga makauna molabaw dili moabot og double digits.

Ang Atan Guardo miabante lang og uno punto paghuman sa unang kuwarter, 28-27 nga nakapakurog sa mga magduduwa. Misamot kakulba ang duwa dihang nagtabla ang iskor, 46-all sa halftime. Ang Espongklong mi-rally sa sunod nga kuwarter aron pag-ilog sa labaw, 70-67 pagsugod sa katapusang kuwarter.

Hinuon, ang Atan Guardo nga gipangulohan ni Totong Villanueva miilog sa labaw sa himalatyong oras aron pag-angkon sa kadaugan.

Gawas ni Villanueva, kinsa mibugha og 30 puntos, laing upat ka players ang milansang og double figures alang sa Atan Guardo.

Ang summer sports league gipasiugdahan sa Sambag I Barangay Council ubos sa liderato ni Brgy. Capt. Jerry  Guardo uban sa suporta sa Uniherb Philippines, ang tiggama sa nabantog nga food supplements sa nasud sama sa Arthro, Kidneycare, Heartvit ug Diabet.

Puntos Matag Usa

Atan Guardo (85) - Villanueva 30, Jumao-as 15, Rio 12, Faciol 11, Alvarado 10, Lastimoso 7

Espongklong (84) - Cabrera 25, Gocotano 20, Tiempo 16, Mahusay 16, Abella 7