SISTA, Black Arrow milubong sa kontra

Gilubong sa walay puangod nga SISTA Super Sealers ang Julie's Bakeshop, 104-83 aron pagposte sa ilang ikaduhang sunod-sunod nga kadaugan sa Punta Princesa Sports Association (PPSA)-Atan Guardo Sinulog Cup basketball tournament diha sa Vicente Sotto Memorial Gym sa barangay Punta Princesa, ning siyudad.

Si kanhi Cebu Doctors College Stallion nga si Michael Duran ug ang sentro niining si Ralph Bruzon nidiskarga og 20 puntos matag usa alang sa Super Sealers, kinsa nidominar sa duwa gikan sa pagsugod hangtod sa paghuman ug nilabaw kini og labaw sa 20 puntos sa pipila ka higayon.

Si Egang Tabalin nitampo og 16 puntos, samtang si Misael Arias niamot og 13 puntos alang sa Super Sealers nga nipakita sa ilang ka-teamwork.

Si Audie Abejo, kinsa nibugha og 20 puntos maoy nangulo sa pilderong Breadmakers.

Sa laing duwa, ang Black Arrow Security Agency nga gipangulohan ni Lando Almojallas mitumba sa RCAF sa iskor nga 101-85.