Murillo makontra ni Rey Bautista

Ang Colombian knockout artist nga si Felix Murillo maoy makontra ni ALA Stable teenage sensation Rey 'Boom Boom' Bautista sa undercard sa "Double Trouble" boxing promotion diin sila si Manny Pacquiao ug Erik Morales mopakita sab sa ilang abilidad karong Septiyembre 10 didto sa Staples Center sa Los Angeles, California.

"The teenage phenom Bautista has been pitted by Top Rank against knockout artist Felix Flores-Murillo of Colombia in an eight-round supporting bout," matud pa ni Antonio 'Bidoy' L. Aldeguer, ang manedyer ni Bautista.

Sa maong bigtime double-header, si Pacquiao makigsangka batok sa Meksikanong si Hector Velasquez, samtang si Morales makighasmag ni kanhi USA Olympian Zahir Raheem.

Kun modaog silang duha hayan nga mag-abot sila sa usa ka rematch karong Disyembre o dili ba sa Enero 2006.

Si Bautista, nga maoy kasamtangang WBO Asia-Pacific bantamweight champion, mo-away sa labing unang higayon sa US mainland. Nakawadwad na siya sa iyang abilidad didto sa Hawaii niadtong Marso diin iyang gipakamang sud lamang sa duha ka hugna si Thai Aree Phosuwangym didto sa Neal Blaisedell Arena.

Ang 19-anyos nga si Bautista, nga nagbitbit og 16-0 win-loss record uban ang 12KOs sukad siya nahimong pro duha ka tuig ang milabay, nahiubos na karon sa hugtanong pagbansay-bansay ubos sa paggiya ni 2003 Trainer of the Year awardee Freddie Roach didto sa Wild Card Gym sa Hollywood.

Sigun sa Fightfax, si Murillo nagbitbit og 13-4-1 win-loss-draw record ug 11 sa iyang biktima iyang gipalukapa.

Dili basta-basta nga kontra si Murillo gumikan kay duna kini kusog ug seguradong hatagan niini si Bautista og usa ka malisud nga away.

Sa laing bahin, si Pacquiao ug si Velasquez gikatakda nga maghimamat sa labing unang higayon karong buntag sa press conference nga gipasiugdahan sa Top Rank didto sa Max's of Manila sa Glendale, California.