Giv. PharmaQuick mag-aagawan sa huling slot ng PBL Chairman's Cup

Nakataya ang ikaapat at huling semifinal slot sa sudden death game ngayon ng Giv Beauty Soap at PharmaQuick sa 2001 PBL Chairman’s Cup sa Makati Coliseum.

Dahil dito, siguradong mainit na bakbakan ang magaganap sa engkuwentro ng Soap Experts at Drug Specialists sa ganap na alas-4 ng hapon.

Nakuha ng PharmaQuick ang karapatang hamunin ang Giv para sa huling semis slot matapos mamuno sa Group B ayon sa format ng liga.

Ang Drug Specialists ay tumapos ng 7-5 record habang ang Soap Experts naman ang nangu-lelat sa Group A.

Base sa format, may karapatang lumaban para sa huling semis slot ang No. 1 team ng Group B laban sa No.4 team ng Group A.

Ang mananalo sa labang ito ay makakasama ng Shark Energy Drinks, Ana Freezers at ng defending champion Welcoat Paints sa crossover semis.

Makakasagupa ng Shark ang mananalo sa labanang Giv at PharmaQuick.

Ang Power Boosters at Freezer Kings ay tumapos ng 9-2 at 9-3 win-loss slate sa quarter-finals, ayon sa pagkakasunod bilang No. 1 at No. 2 teams.

Nakuha ng Ana ang No. 2 slot matapos igupo ang Paint Masters sa preview ng kanilang semis match, 73-70 sanhi ng pagkalagpak ng House Paints sa No. 3 spot.

Ayon pa sa format, ang No. 1 team at No. 4 ang magasasagupa at sa isa pang semis match ay maghaharap naman ang No. 2 at No. 4 teams.