Cigaret smuggling

Ngilngiga og pamaagi sa mga smugglers sa pagpayuhot nila og mga kontrabando, pero nasakpan gihapon sila sa National Bureau of Investigation (NBI) ug mga sakop sa Bureau of Customs.

Nasakmit sa NBI ang 59 ka container vans nga puno sa mga imported nga sigarilyo gikan sa China ug Taiwan, unya gibutangan og mga ngalan sa mahalong matang sa sigarilyo.

Apan ang kadaghanan sa mga gipayuhot nga sigarilyo nga nagkantidad og binilyon ka pesos, dinhi na masakmit sa Cebu ug ang uban didto sa Manila.

Ang paagi diay sa mga smugglers mao nga ang mga sigarilyo isulod nila og container vans gikan sa China ug Taiwan, ug ikarga sa mga dagkong barko paingon sa lawod.

Ang mga smugglers nakigsabot sab og commercial vessels dinhi sa Pilipinas aron mosugat sa mga barko didto sa lawod nga gikargahan sa mga smuggled nga sigarilyo. 

Kon mag-abot na ang maong mga barko, magtupad ang duha ka barko ug ibalhin ang mga container vans nga puno sa sigarilyo, paingon sa mga interisland vessels nga mao na ang modala niini sa lainlaing dapit sa nasud.

Nasabtan ba ninyo kon nganong ingon niini ang pamaagi sa mga smugglers? Kon ingon gud niining paagiha nga modunggo sa mga pantalan ang mga interisland vessels, magtoo na man ang Customs nga dili na kini imported ang kargamento.

Kay kon ang foreign vessels maoy modunggo sa pantalan, sigurado man gyud nga pangitaan sila og dukomento sa ilang kargamento, ug pabayron gyud sila og buhis.

Bilib ko sa pamaagi sa mga smugglers, apan matud pa lagi sa panultihon “Way aso nga makumkom,” mao nga masayran ra gihapon kini sa mga tinugyanan sa balaod.

Trese ka tawo, apil ang mga tag-iya sa Gothong Lines, gipasakaan og kaso nga paglapas sa Anti-Agricultural Economic Sabotage Act of 2004.

Di pa gyud hinuon kita makaingon nga nakahimo na gyud og sala ang mga gipasakaan og kaso, kay motubag pa man sila niini didto sa Department of Justice.

Ang argumento sa NBI pinaagi ni Director Melvin Matibag mao nga isip mga tag-iya sa pantalan, imposible nga wa sila masayod nga mga smuggled ang maong mga kargamento nga gidawat nila.

Ang 36 ka containers sa mga pinayuhot nga sigarilyo nasakmit sa Gothong Wharf sa Mandaue City, ug ang 23 didto sa Manila. Nindot ni nga sundon ang maong isyu kay matud sa NBI, tinud-on gyud nila ang pag-imbestigar aron dili ra ang mga gagmay’ng kawani maoy mag-atubang og kaso.

Apan ang mga sakop sa pamilyang Gothong nga gilambigit sa imbestigasyon, kusganong nanghimakak nga apil sila sa cigaret smuggling, ug andam silang mopasabot niini ngadto sa DOJ.