Kinsay mas kahadlokan?
Nireklamo si Bise Presidente Sara nga nasakitan ang mga trabahante sa Office of the Vice President (OVP). Kada banat sa administrasyon ni Presidente Ferdinand Marcos Jr. batok niya. Nahadlok. Naglibog. Nanghilak. Mao nga nipatuman sila og mental health program.
Makiangayon ang pag-atiman sa mental health. Pero dunay pangutana nga angay tubagon. Unsa ang mas makapaguol sa taga OVP: Ang pagpangutana sa Commission on Audit (COA) kon asa gigasto ang P612.5 milyones nga confidential funds niadtong 2022 ug 2023? O ang pagtubag sa mga pangutana nganong nganong walay klarong mga dokumento ang ilang mga transaksiyon? Ang COA ni-disallow sa P448 milyones nga confidential funds sa OVP ug Department of Education (DepEd). Dili kini intriga lang. Kwarta kini sa katawhan.
* * *
Unsa ang mas makapa-trauma: ang imbestigasyon sa kabtangan nga wala motakdo sa statements of assets, liabilities and net worth? O ang pagpaminaw ni VP Sara nga niangkon nga nakigsabot na siya sa usa ka tawo nga mopatay nilang BBM, Liza ug Martin kon adunay mahitabo niya? Dili joke. Dili joke.
Ug unsa ang mas makapahadlok sa OVP: ang pag-atubang sa mga pangutana sa iyang suburno sa mga opisyal sa DepEd o ang hulga nga ugkaton ang patayng lawas ni Ferdinand Marcos Sr. ug ilabay sa West Philippine Sea? Dili kini mga istorya gikan sa mga marites. Si VP Sara mismo ang nisangyaw sa publiko.
* * *
May molabaw ba kamakalilisang sa iyang amahan? Si Rodrigo Duterte nisugo sa laktod nga pinatyanay sukad pagka mayor hangtod na-presidente. Iyang drug war nagbilin og liboan ka patayng lawas ug mga pamilya nga nangayo og hustisya. Nga imbes makasulbad nipasamot sa ilegal nga drugas.
Iyang mga hulga batok sa human rights groups ug kaparian, apil ang pasidaan pagsagpa sa Santo Papa, dili sekreto.
* * *
Kon dunay trabahanteng si VP Sara nga na-stress, tabangan. Kon dunay nagtiyabaw, paminawon. Hatagan og propesyonal nga tabang.
Pero dili himuon nga panagang ang ilang kabalaka batok sa paningil sa publiko. Ang gobyerno dili pribadong negosyo. Ang OVP dili personal nga opisina. Ang accountability ug transparency dili bullying. Mas makapa-alarma ang iyang pagsingka ug panginsulto. Sa mga magbubuhis nga maoy nagsuweldo niya.
* * *
- Latest
