Kataw-anan!

Tinuod ba nga kon mo-income ka og P96.22 sa usa ka adlaw, dili ka na pobre? Ang pamahayag sa Philippine Statistics Authority (PSA) nakaani og pagsaway sa katawhan. Di man gani kuno makapalit og value meal sa Jollibee ang P96.

Nikunhod kuno ang pobre sa Pilipinas ngadto na lang sa 9.7% sa 2025. Nganong nakaingon sila niini?

Ang ilang Poverty Threshold para 2025 kay P35,121 nga kita sa usa ka tawo sa usa ka tuig. Kon imo nga i-divide ang P35,121 sa 365 ka adlaw, mogawas gyud ang P96.22.

So gikan gyud na sa gobiyerno ha? Dili na fake news. Ang formula kay gikan sa PSA mismo. Sa ato pa, kon P100 ang imong makuwarta sa pagpamunit og basura, dili ka na maisip nga pobre.

Pero kon pamilya mo nga lima ka tawo, dili P96 ang inyong budget sa tibuok adlaw. Kinahanglan nga P96.22 x 5 = P481 dili ka na diay kuno pobre.

Sagopon ba nimo ang giingon sa kadagkoan sa PSA? Sus, ang bugas karon mahal na kaayo, sud-an, plite, bayranan sa kuryente, tubig, load — kulang kaayo uy!

Atong ipasabot nga ang P96.22 nga threshold dili living wage. Survival ra na. Unsay gastohan sa P96.22? Apil na diha ang pagkaon ug non-food expenses, sama sa abang sa balay, plite, tambal, kuryente. Tanan na kana!   

Ug ang ilang basehan sa pagkaon, least-cost meal — pinakabarato nga kombinasyon nga makabusog, apan dili lami. Mora’g tan-aw nako, karaang formula ang ilang gigamit.

Mao ni nga ang usa ka mantalaan sa Manila miingon, “P96 a day is hardly a measure of what it costs to live a decent life.”

Kaniadto ang PSA miingon nga ang food budget sa usa ka tawo, P64 ra, ug wa ko makalimot nga nabulit sila sa pagsaway. Bahinon nimo ang mao nga kantidad og tulo ka kaonan, makapalit ka ba og pagkaon nga P20 lang?

Mao nga kon sa dukomento sa PSA ka mobase, ang 6.4% na lang kuno ang pobre nga pamilya sa Pilipinas, pero kon mangutana ka sa kanto, 70-80% ang moingon pobre sila. Layo ra kaayo ang statistics sa PSA.

Kana gani nga P584 nga minimum wage para sa mga minimum wage earners dinhi sa mga highly urbanized city sa rehiyon, kuwang ra man gani na.

Para sa ordinaryong Juan Dela Cruz, ang P96.22 dili na pang-adlaw-adlaw nga budget. Pang-usa ka kaon nga pinobre ra na.