Mag-asawa ninakawan na, pinatay pa!
COTABATO CITY, Philippines — Karumal-dumal ang sinapit ng isang mag-asawang Moro matapos na pasukin at pagnakawan ng mga armadong lalaki at pinagbabaril pa hanggang sa mapatay sa loob mismo ng kanilang bahay sa Sitio Matiyumpong, Barangay Dalgan, Montawal, Maguindanao del Sur nitong gabi ng Martes.
Kinilala ng mga local executives sa Montawal at Pagalungan sa Maguindanao del Sur at sa kalapit na Bangsamoro Special Geographic Area sa Cotabato, ang mag-asawa na sina Alex Monib Pandapatan at Bai Macabimban Salipada-Pandapatan na kapwa idineklarang dead-on-the-spot dahil sa mga tama ng bala sa kanilang katawan.
Sa imbestigasyon ng pulisya, pumasok ang mga armadong lalaki sa bahay ng mag-asawang Pandapatan, mabilis na naghalughog at pinagkukuha ang mga pera, alahas, at cellphone ng mga biktima, saka sila pinagbabaril ng mga assault rifles at agad na tumakas.
Nakatakas ang mga salarin bago pa makarating sa lugar ang mga boluntaryong community watchman at mga opisyal ng barangay sa Dalgan na rumesponde sa insidente.
- Latest
