Kon mapatuman lang unta Kanindot paminawon
• Si Honeylet Avanceña nga nibukol og polis ug nibangga og heneral ug si Kitty Duterte nga nibalikas sa samang heneral dinhi sa Pilipinas naabtan og tulo ka adlaw una gitugotang makigtagbo ni Rodrigo Duterte sa prisohan sa The Hague;
• Si Salvador Medialdea, sinaligan sa niaging administrasyon, gibalibaran sa mga guwardiya sa samang prisohan bisan nagpailang abogado sa samang piniriso; ug
• Si Harry Roque, nanghinaot nga madugta si Leila de Lima sa prisohan, wala pasudla sa gallery sa pag-atubang sa samang piniriso sa mga huwes sa International Criminal Court.
* * *
Walay mosukol nila sa Pilipinas, labi na niadtong presidente pa si Duterte: Kay si Honeylet iyang kapuyo; si Kitty ilang anak; si Salvador iyang administrador sa Davao City Hall ug executive Secretary sa Malakanyang; ug si Harry iyang tigpamaba. Pero didto sa The Hague wala kapamugos kay managsama ang ilang atraso: Wala dayon kakuha og permiso pakigkita sa piniriso silang Salvador, Honeylet ug Kitty; ug walay permiso bisan sa pagsulod na lang sa gallery para sa publiko si Harry nga nipasigarbong siya ray ICC-accredited nga abogado sa ilang grupo.
* * *
Kanindot diay kon mapatuman ang mga lagda bisan unsa kahawod ang hingtungdan ug bisan unsa kadako ang maig-an:
• Wala kapamugos si Bise Presidente Sara Duterte pagpasulod sa prisohan sa higanteng Balikbayan box ug laing tulo ka kahon sa kabtangan para sa samang piniriso; ug
• Wala kalusot ang pangangkon sa samang nagpailang abogado nga masakiton ug himatyon ang samang piniriso kay nasusi sa mga doktor sa ICC nga maayo ang iyang kahimtang sa panglawas ug panghunahuna.
* * *
Dunay timaan nga mapatuman sang mga lagda sa impeachment trial sa samang bise presidente. Bisan giyak-an sa mga senador, madayong husay karong Hulyo ug mahimong makonbikto na karong Oktubre bisan kon padayong mobakasyon ang samang bise presidente sa The Hague. Pero kutob ra ta sa pagpanghinaot nga unta tanan. Kay nahibawo tang tanan nga, bisan sa mga pasangil sa kawat sa kuwarta sa Philippine Health Insurance Corporation (PhilHealth), maniobra sa 2025 national budget ug pamugos sa Maharlika Investment Fund, dili makadulot ang mga lagda batok nilang Ferdinand Marcos Jr., Martin Romualdez ug mga alyado sa mga nipuli pagtungkawo sa samang Malakanyang.
* * *
- Latest
