Raffy Tulfo mapahitas-on

Misikat ang ngalang Raffy Tulfo tungod sa iyang Raffy Tulfo in Action sa social media. Nahimo siyang dangpanan sa mga adunay dagkong suliran sa pamilya, silingan, ka-relasyon ug isi'g ka tawo, diin inay adto modangop sa tukmang dapit, otoridad o hukmanan, siya maoy giduol tungod kay isog mang mangasaba, mopakaulaw ug mohusgang sad-an ang gireklamo, sa mireklamo, kinsa maoy iyang gilabanan.

Dinhi misamot kadato si Raffy. Nahimo siyang usa sa highly paid You Tube vloggers. Dinhi siya nasuod sa tanang natabangang kabos. Gani, wala siya maglisod pagdaog dihang milansar pagka-senador. Apan sa samang higayon, gikahiubsan siya sa daghang gisumbong sa iyang programa, kinsa naulaw intawon tungod sa pagbandilyo sa personal nilang kinabuhi (labi na sa sulirang pangmagtiayon).

Kon palawman ang pamalandong, dili baya panig sa gireklamo ray naulawan. Hasta side sa mireklamo, silang duha pulos naulawan. Ang pangutana: Dili ba mamili si Raffy sa himoan niyag contents? Pagtabang ba gyod ang iyang tumong, o ang pagpadaghan ra sa iyang viewers, bahala nag may tawong giyatakyatakan-nasakitan?

Angay hinumdoman kining gisulti sa atong Ginoo:  Kon may ihatag mo sa kabus, ayaw'g banha ingon sa gibuhat sa mga tigpakaaron-ingnon sulod sa mga sinagoga ug kadalanan aron dayegon sa mga tawo.  (Mateo: 6-2).

Paglingkod ni Senador Raffy sa Senado, misamot pagdako iyang ulo. Pirmeng gipakita nga siya maoy kinahawran sa tanan. Mahilig siyag grand standing. Usahay, mosapaw pag sulti bisag naa pay kaubang nagtabi. Kanunayng mipabati sa iyang kahawod ug kaisog, diin bise presidente ka man o opisyal sa kasundalohan, sayonsayon ka ra niyag insulto.

Sa usa ka Senate hearing, masuk-anong giakusahan ni Tulfo ang mga tawo ni Presidential Peace Adviser Carlito Gavez Jr., 1985 PMAyer graduate, nga korap kuno.  Ug giingnan pa si Galvez, kinsa gusto pa untang mopahayag, nga:  Well, Sir, I stand by what I said. Meron pong korapsiyon dito. Kon masaktan ka, masaktan ka! I don t care!  Ingon niini ka arogante manulti si Raffy. Ang pagkawala g'yoy tahod bisan gamay na lang ngadto sa kaubang opisyal.

Wala pa gani si Raffy ma-presidente sa Pilipinas, miladlad na sa iyang pagkamapahitas-on-pagkahambugero. Unsa na kaha kon siyay modaog sa 2028 presidential election?

Mga botante, please, ingat intawon!