Taphaw nga tabang

Sa iyang mensahe atol sa pagtimaan sa Labor Day gimando ni Presidente Ferdinand Marcos, Jr. ngadto sa tanang regional wage boards ang pag-review sa minimum nga suholan sa mga mamumuo diha sa tagsa-tagsa nila ka mga rehiyon.

Kini aron kuno katabangan ang mga anak sa singot nga makasugakod sa epekto sa nagpadayong huwaw ug sa umento sa mga palitonon.

Dungan niini ang panawagan sa presidente ngadto sa kongreso nga ipasar ang pipila ka mga priority bills sa iyang administrasyon.

Apan wala malakip sa listahan sa mga balaudnon nga iyang gipadali sa kongreso ang sugyot nga umento sa sweldo.

Ang Senado mipasar na sa balaudnon nga maghatag og P100 nga usbaw sa inadlaw nga suholan apan ang counterpart bill didto sa House of Representatives wala makairog tungod kay daghan sa mga kongresista ang supak niini.

Mas nituo ang kadaghanan sa mga kongresista sa panghulga sa mga negosyante nga daghang mga negosyo ang posibleng manirado kun ipamugos ang legislated wage increase.

Nga ug kun kini mahitabo mas daghang trabahante ang mawad-an og panginabuhi.

Maong inay pukpokon sa presidente ang iyang mga kaalyado sa kongreso nga ipasar ang wage hike bills nga ilang giyak-an, mas gipili sa presidente nga ipasa ang trabaho ngadto sa mga regional wage board.

Gihatagan lang sa presidente og 60 ka adlaw ang mga wage board lukop nasud paghimo sa trabaho.

Apan duda ko duna bay kapaingnan kining maong kamandoan.

Kini tungod kay sulod sa daghang katuigan wa pay record ang RTWPB nga mihatag makatarunganon nga kantidad sa umento sa suholan.

Sa ilang kasaysayan kanunay'ng tua kapusta ang RTWPB sa mga kapitalista. Bisan dunay duha ka labor representative nga naglingkod sa RTWPB apan moawop ang ilang mga tingog sa mataghigayon nga magkunsabo ang mga representante sa gobyerno ug sa management.

Ang resulta may umento man tuod apan kasagaran ang kantidad tabla ra sa limos.

Kun seryoso gyud ang presidente pagtabang sa mga mamomoo ug dili ra pakitangtawo ang iyang gihimo mas maayo tingali nga lakip sa iyang ipadali sa kongreso ang pagpasar sa mga nag-ong-ong nga wage hike bills.