EDITORYAL - Kinahanglan ang rail system

Karon nga natapos na ang konsolidasyon sa public transportation nga maoy tumong sa modernisasyon niini, matawag nga nagkahugpong na gyud tanan ang mga drayber ug operators.

Nagkasinabot na sila kinahanglan na gyud ang modernisasyon sa maong sektor dili lang para nindot tan-awon ang mga pasaheroan kondili mas haruhay ug hamugaway na ang mga pasahero sa ilang pagbiyahe.

Apan kinahanglang magbantay ang tanan, gikan sa mga sumasakay ngadto sa gobiyerno, kay karon mabalik na usab ang kakusog sa impluwensiya sa maong sektor sa panahon nga duna silay gustong pangayoon.

Usa na niini ang nagung-ong nga sugyot nga patas-an na ang pletihan sa modern PUVs kay lagi mahal daw ang kuha nila sa matag unit nga adto nila bayran sa mga bangko nga maoy nipalit niini.

Kun sa nakalabay nga dul-an napulo ka tuig wala na kaayoy epekto ang mga transport strikes kay dili na sama kaniadtong dekada 80  kalig-on ug nagkahiusa ang transport groups, karon lahi na.

Kay makaingon naman sila nga nituman mi sa gusto sa gobiyerno nga modernisasyon, nisugot mi nga mangutang para niini, karon kinahanglan namo kining bayaran.

Ang regulasyon sa pletihan ang gobiyerno ang magbuot, mao nga sa sunod unya nga mga adlaw o buwan, sila napuy rumbohon aning transport groups nga modemanda og usbaw.

Gawas sa usbaw sa pletihan, naa pay mga pagsaka sa produktong petrolyo nga makapuno sa ilang mga rason aron patas-an ang singil sa pletihan.

Mao gani nga kinahanglan gyud, magtukod og dugang alternatibong tranportasyon para sa publiko nga di kinahanglan og drayber ug operators gikan sa pribado nga sektor. Ang labing epektibo, moderno ug dili kaayo maapektahan sa pagsaka sa produktong petrolyo, mao ang rail transits. Wala kini daghang drayber o operators.

Karon palang maayong sugdan na kini sa pagtuon sa tanang stakeholders o interesadong dagkong kompanya nga gusto nga mamuhonan niini.

Mahimo kaayo kini pinaagi sa build operate transfer ug public-private partnership aron dili mabug-atan sa budget ang gobiyerno.