Oratio Imperata sa uwan
Mahimo tang motunglo sa labing dako og atraso sa pagpanamastamas sa atong kinaiyahan ning grabeng kainit nga atong nahiagoman tungod sa global warming nga nisamot tungod sa El Niño nga samtang nagkahinay na padayong mopaso ug mopauga nato hangtod sa kataposan ning buwana.
Mahimo sab ta nga mopatuman, magkat-on ug makigsawo sa mga silingan sa labing mamugnaon nga mga paagi, nga wa magkinahanglan og daghang tubig ug di mokonsumo og daghang kuryente, sa pagsagang sa nagkagrabe nga kaalimuot sa sud ug sa gawas sa atong mga pinuy-anan, trabahoan ug eskuylahan.
* * *
Mahimo sab tang mangaliya. Way garantiya nga paminawon ta. Pero kon magdungan og piko sa atong tuhod ug kinasingkasing mobayaw ang atong pangilaba, kinsa man ang mobatok nato?
Nangahas ko og Binisaya sa Oratio Imperata para sa uwan sa Catholic Bishops Conference of the Philippines nga litukon sa mga Misa sa mga simbahan tibuok nasud sugod karong adlawa.
* * *
“Ginoo, among mahigugmaong Amahan,
Tigmugna sa among planeta ug uniberso
ug sa tanang kahibulongang mga tipik sa kinaiyahan
nga nagsustinir sa imong buhi nga mga linalang,
mapaubsaon ming moawhag paghatag namo og alibyo
gikan sa grabeng kainit nga nihakop sa imong katawhan ning higayona,
nakahasol sa ilang kalihokan ug nakahulga sa ilang kinabuhi ug panginabuhi.
Padad-i kami og uwan aron mapuno ang naughan nga mga tinubdan sa tubig, aron mabasa ang among umahan, mosulbad sa kanihit sa tubig ug kuryente
ug mohatag og tubig sa among inadlawng mga panginahanglan.
“Sa imong sugo ang hangin ug dagat motuman.
Ipataas ang imong kamot, Gamhanang Ginoo,
pagpugong sa nisulbong nga temperatura
aron ang imong katawhan makapadayon sa mabungahong kalihokan
ug mga batan-on makapadayon pag-eskuyla sa kalinaw ug kasayon.
“Manggiluy-on ug manggihatagon nga Ginoo,
ablihi ang among mga mata sa kaadunahan ug katahom sa imong mugna ug gasahi kami sa lawom nga gugma ning planeta ug sa tanan nga naa niya.
“Tudloi kami nga mahimong manggialamon nga mga tinugyanan sa imong mga mugna
aron nga kami sa tanang higayon responsable nga mogamit nila ug manalipod nila gikan sa abuso ug pagpahimus.
Ning panahon sa krisis, minahal nga Ginoo,
Palihoka kami sa pakigsawo og dugang, pag-alagad og dugang ug paghigugma og dugang.”
- Latest
