Konseho sa Cebu City niawhag nga pahulipan ang pangulo sa CAD

CEBU, Philippines — Ang Cebu City Council nipasar og resolusyon nga nag-awhag sa buhatan sa mayor nga hulipan ang kasamtangang city agriculturist tungod kay giingong dili kini episyente sa pagtubag sa mga panginahanglan sa mga mag-uuma taliwala sa El Niño phenomenon.

Niadtong Miyerkules, si Konsehal Pastor “Jun” Alcover, chairman sa Committee of Agriculture sa konseho sa dakbayan niluwat og privilege speech sa konseho aron ipaabot ang iyang kabalaka sa kahimtang sa mga mag-uuma taliwala sa El Niño.

Matud ni Alcover nga pipila na ka mga higayon nga iyang gihangyo ang mga ahensiya ug hingtungdan nga mga buhatan sa pagplano sa ilang aksiyon aron makapangandam sa daotang epekto sa El Niño pinaagi sa usa ka executive session.

Gisubli usab niya nga kaniadtong Marso 28, 2023 usa ka taho ang gipasa sa executive department nga nagdala sa iyang mga rekomendasyon human sa usa ka tigom sa mga representante sa mga hingtungdan nga ahensiya human sa verbal order sa mayor.

“But until now, wa pay klarong plano gihimo ang CAD nga gipangulohan ni Mr. Joelito Baclayon”, padayag ni  Alcover.

Matud ni Alcover nga adunay11,000 ka mag-uuma sa siyudad nga nameligro ang adlaw-adlaw nga panginabuhian gumikan sa huwaw.

Subay niini, ang mga mag-uuma giingong nihangyo kini alang sa ilang mga kagamitan sa panguma kaniadtong niaging tuig apan giingong walay nahimo.

Gitumbok usab ni Alcover ang kapakyas sa City Agriculture Department (CAD) sa paggamit sa gigahin nga pundo alang sa mga mag-uuma nga giaprobahan alang sa tuig 2023.

Gibutyag ni Alcover nga sa P85.9 milyones nga budget appropriation, P21 milyones lang niini ang nagamit.

“Aduna pay laing P7 million gikan sa National Government nga naglakip sa P19 million Bayanihan program niadtong tuig 2021 gigahin sa mga proyekto sa mga mag-uuma. Apan P12 million kapin lang ang nagamit ug na-revert back ang P7 million”, matud ni Alcover.

Ug giingong wala usab tagda ang mga hangyo sa mga mag-uuma nga importante unta sa pagsulbad sa El Niño.

Giingong ang mga mag-uuma wala matagbaw sa serbisyo sa CAD diin nisangpot kini sa dili maayong relasyon ni Baclayon tali sa farmers association.

Ug gumikan niini, giawhag ni Alcover si Baclayon nga mokanaog sa katungdanan isip pangulo sa CAD. BDB BANAT NEWS