Pagkaon nga hinukad sa Gugma

Bugas nga tag 20 pesos ang kada kilo nga aduna pa gyuy pakapin nga sod-an nga naglakip sa delata nga sod-an noodles ug ubang gamit sa kusina, yes tinood ni ang inyong nabasahan dili niya siya mugna mugna lang ug dili kutob sa baba sa nagpasiugda kay taod taod na nila kining gihimo ngadto sa mga poorest of the poor nga maoy nagkinahanglan.

Kini ang programa nga hinukad sa gugma sa kaparian sa Archdiocesan Shrine of St. Therese of the Child Jesus sa baranggay Lahug dakbayan sa Sugbo diin natukod ang ilang Parish Caritas nga tinahan, gamay ug rano ra gud kaayo nga Caritas store apan inig sulod nimo puno sa gugma ang imong mabatyagan tungod sa akto sa kalooy nga ilang gipaambit ngadto sa katawhan.

Nahimamat nako ang Parish Caritas Incharge nga si Fr. Joseph Jojo de Aquino kinsa midetalye sa ilang programa nga gitumong alang sa tanang nagkinahanglan ug masustineran ba nila kini, simple ra kaayo ang iyang tubag ang pagbuot sa Ginoo ang agdon.

Ang mga makolektang halad sa gugma ug mga donasyon ang gihimo nilang tinubdan sa pagkaon nga ilang gibaligya sa mga tawo diin limit lang ngadto sa tag tulo ka kilo ang mapalit sa kada tawo sa tag 20 pesos ang presyo matag kilo, kong kwentahon mas barato pa gani kini sa tag 20 pesos per kilo kay aduna may pakapin nga sod-an nga mga delata ug noodles.

Gipasabot ni Fr. Jojo nga dili dole out ang programa sa simbahan nga maayo usab nga programa kay kadtong mga nagkalisod apan maka afford pa sa pagbayad makabatyag nga dili gyud sila ingon niana ka walay pulos kay nagpabilin ang ilang dignidad isip usa ka tawo.

Labaw sa tanan, sa 20 pesos nga ilang ibayad makatabang na usab sila sa sama nilang nagkalisod tungod kay ang kwarta nga makolekta sa Caritas store mao may gamiton sa pagpangomra sa mga sod-an ug ubang mga kinahanglan sa kusina nga ipares sa bugas nga mamahimo nang complete food package.

Taliwala sa kalisdanan mamahimo pa nga makatabang ang mga kabus ngadto sa ilang isig ka tawo, hinoon giklaro sa pari nga adunay mga tawo nga walang wala gyud nga hatagan nila og libreng bugas ug sod-an.

Gihan-ay lang sa Caritas ang lagda tungod kay dunay uban nga mosakay sa panahon, mangumpra sa bugas magbalik balik ug ilang nasayran nga gipamaligya na diay ang Caritas rice busa gipaagi nila sa mga lider sa kapilya ang lista kinsa ang angayan nga makabenispiyo sa bugas, apan kong dunay moadto sa ilang gamayng tindahan mahatagan gyud gihapon.

Alang sa mga tawo nga duna pay ginagmay nga ikasarang, ipalabi nalang sa uban nga lisod gyud kaayo ang kahimtang dili ipatigbabaw ang kahakog kon dili ang kaaghop sa kasing kasing nga maluoy sa mas nagkinahanglan. Dili makapasalig ang Parish Caritas hangtud kanus-a sila makapadayon sa programa tungod kay admitido sila nga limited ang tinubdan apan sukad sa pagsugod nila wala pa man sila mahubsan.

 Kini tungod matud pa sa infinite love nga gipakita sa Ginoo nga nigamit sa mga tawo aron mapakita dakong gugma sa katawhan nga maoy angayan nga sumbanan sa tanan.

Kung nakahimo ang gamayng komunidad sama sa St, Therese Parish Caritas walay rason nga dili makahimo niini ang uban, dili na huwaton pa nga mahitabo ug matuman ang gipanaad nga tag 20 pesos per kilo nga bugas kay gihimo na kini sa uban ug unta manakod pa kini aron daghan ang mabusog sa pagkaon nga hinukad sa gugma sa tawo ug sa Dios.