Di katug maghayang

Giuwan og mga kaso si Cebu City Mayor Michael Rama atubangan sa Ombudsman Visayas ug sa Office of the President tungod sa iyang mga atraso batok sa Cebu Port Authority ug sa Metro Cebu Water District.

Ambot gasabot bang mga opisyal sa CPA ug MCWD o sulagma lang nga nagkadungan sila og sang-at og reklamo didto sa buhatan sa presidente pinaagi sa Department of Interior and Local Government (DILG)? Ang mga kaso nag-ugat sa pagpanghasi sa mga opisyal sa City Hall batok sa CPA ug sa MCWD.

Sayo niini, gipakoral ni Rama ang proyekto sa CPA diha sa pantalan tungod sa matud pa kapakyas niini paglukat og building permit gikan sa City Hall. Ang CPA miingon nga wala sila magkinahanglan og permiso gikan sa LGU sanglit duna silay kaugalingon nga charter.

Sa pikas bahin gireklamo sa MCWD pinaagi nilang chairman Jose Daluz III ug general manager Edgar Donoso ang pagpanglungkab sa mga opisyal sa City Hall sa ilang buhatan taliwa sa nagpadayong panang-ilog sa liderato sa water district.

Klaro ang tumong sa MCWD ug CPA, ilang ipasuspenso o ipatangtang gyud sa pwesto si Rama hinungdan nga didto nila isang-at ang reklamo sa Office of the President. Si Rama sayod sa mamahimong samputanan sa maong mga kaso---posible siyang masuspenso sa dili pa ang eleksiyon karong Mayo sunod tuig.

Sanglit di malikayan ang politika didto sa buhatan sa presidente, di layo nga masubli ang nahitabo ni Rama niadtong 2015 ug 2016 atol sa pamunoan ni anhing presidente Noynoy Aquino nga kaduha gyud siya masuspenso.

Una siyang gisuspenso niadtong 2015 tungod sa reklamo ni kanhi Labangon barangay captain Victor Buendia human gipabungkag ni Rama ang center island tungod sa barangay hall nga wala moagi og korte.

Gisundan ang maong suspension niadtong 2016 tungod sa illegal nga pagpanghatag ni Rama og P20 mil nga calamity assistance sa mga opisyal ug kawani sa City Hall bisan wala sila mabiktima sa linog. Si Rama di kaalyado ni Aquino niadto.

Taliwa niining mga kaso nga giatubang karon ni Rama, di sab imposible nga magsagunson ang iyang suspension. Samtang nangangkon si Rama nga kaalyado ni Presidente Bongbong Marcos, di ikalimod nga dunay mga pwersa dinhi sa Sugbo nga mas suod sa presidente ug iyang kontra.

Ug labing siguro nibahakhak sa hilom sa hilom ang mga kaatbang ni Rama sa politika nga naghinamhinam na nga mopuli sa iyang pwesto. Ang labing mabulahan kun masuspenso si Rama mao si Bise Mayor Raymond Garcia.

Gawas nga siya maoy mamahimong acting mayor, posibling siyay makapahimus sa makinarya sa syudad atol sa kampanya kun siya ugaling modagan man gyud pagkamayor sa 2025.

Ug tungod kay ang bise mayor pag-umangkon man ni Gobernador Gwen Garcia nga karon gikabikil na ni Rama, tingali nasayod na ang mayor unsay posibling mahimo sa gobernador. Wala man tingali malilong niya ang kasuod sa gobernador ug sa presidente. Mura’g di katug maghayang si Rama niining panahona.