Mga buaya sa NFA

Kong pabagaay og dagway wala na seguroy makalupig sa mga opisyal ug mga kawani sa mga ahensiya sa kagamhanan nga nalambigit sa pagpangurakot, pwera lang sa mga nagtinarong sa ilang serbisyo. Apil niini ang National Food Authority kon NFA nga nabulit sa kaugalingon nilang hugaw karon human gipangsuspenso tungod sa ilang pagpamaligya sa bugas ngadto sa mga negosyante kay katarongan nila nga madaut kong dili madispatsar sa gikatakdang panahon.

Pastilan wala uroy sila pangilugi sa ilang gibati nga klaro kaayo nga dakong tinonto, nganong wala naman lang nila gipanghatag ngadto sa mga kabus ang bugas aron matabangan ang mga tawong gipanggutom karong panahona ilabi na nga naglisod gyud kay ting gutom man karon. Kong naanugon sila sa pagpanghatag ngadto sa mga kabus, gibaligya nalang unta nila sa mga lokal nga kagamhanan sama sa lalawigan sa Sugbo nga andam gyud mopalit og bugas sa NFA nunot sa programa niini nga tag P20 matag kilo, bahala na og maalkanse ang panudlanan sa kapitolyo basta matuman ang gipanaad kaniadto sa presidente sa tag P20 ang kilo, Si Governor Garcia na ang nag-initiate niini aron makatabang sa Marcos administration nga matuman ang gipanaad sa katawhan,.

Sige intawon og hangyo si Governor Garcia nga baligyaan sila og bugas sa NFA apan limitado ra ang gihatag maong dili gyud makasugakod ang programa nila ubos sa Sugbo Merkado Barato kay mahurot man gud ang supply sa bugas hangtud nga wala na gyud sila baligyai sa NFA. Mora’g nagkatawa sa hilom ani si Garcia karon nga nakarma ang NFA kay gipangkiha naman tungod sa ilang tinonto nga inay ibaligya ngadto sa kagamhanan sa Sugbo ug ubang mga LGU seguro kon dunay sama nga inisyatiba, didto naman hinoon gibaligya sa mga negosyante nga walay bidding gani, kadto ra segurong kaila ug mobahug nila og kwarta?

Kadtong mga sinakong bugas nga alang sa mga biktima sa mga katalagman ang angayan nga mahiadto sa mga tawong nagkinahanglan kay ang huwaw karon maisip man nga dakong kalamidad kay halos wala namay maani nga mga humay, mais ug tanang produkto sa pagkaon.

Maayo unta kon masilotan ang mga nalambigit niining dako nga anomaliya nga naglambigit sa mga ahensiya sa kagamhanan, dili lang kutob sa imbistigasyon kon dili hangtud na sa prosecution ug labaw sa tanan conviction.