EDITORYAL - Mga pantalan sa Cebu City pabalhinon

Migrabe ang kasungian sa Cebu City Government ug sa Cebu Ports Authority  kabahin anang breakwater sa habig sa Campaña Maritima ug Cebu City hall padung sa South Road Properties.

Ang CPA gikiha s tungod sa matud pa walay permiso gikan sa Office of Building Officials (OBO) bahin sa ilang pagtukod og pantalan diha sa maong dapit.

Apan dili kini bag-o, dugay na kaayo ang kasungian sa duha sa nanglabay nga mga mayor sa siyudad, partikular niini kun kinsay dunay hurisdiksyon anang Campaña Maritima.

Ang lugar gustong ipabilin sa siyudad sa kasamtangang kahimtang sanglit giisip kini nga usa sa mga makasaysayanong estraktura sa kasaysayan sa siyudad.

Apan ang CPA gustong usbon ang maong lugar alang sa mga proyekto niining pagpalapad sa ilang mga pantalan nga ilang gidumala dinhi sa siyudad.

Si Cebu City Mayor Michael Rama gusto nga ipabalhin ang CPA ug ang Cebu International Port ngadto sa lungsod sa Consolacion.  Dugay na kaayo kini nga plano kaniadto pa apan wala pa gyud masugdi.

Ang mga pantalan sa Cebu City pagkatinuod dako kaayo og natampo sa kalamboang nakab-ot karon sa siyudad. Kay aning dapita tanan kadaghanan idunggo ang mga produkto gikan sa laing lugar ug vice versa.

Apan tingali, tungod aning kadaghan sa mga dagkong trak nga naghatud ug kuha anang mga kargamento sa mga barkong modunggo sa CPA ports, gusto na sa siyudad silang pabalhinon sa mas maayong lugar.

Kung dili lang isipon nga bati ang tinguha ni Rama, maayo kini nga sugyot. Kay kun mabalhin ang mga pantalan sa Consolacion, siguradong mopaspas ang pagdako ug paglambo sa ekonomiya sa maong lungsod.

Posible pa nilang malabwan ang kalamboan sa ubang mga siyudad sa Sugbu kay siguradong molambo gyud ang negosyo ug komersyo tungod sa magsulod-gawas nga mga inter-island ug overseas nga mga barko.

Sa samang higayon, mapanindot sa Cebu City ang talan-awon sa waterfront niini gikan sa may north reclamation area padung sa SRP. Mosamot katahom ang siyudad kun mahitabo kini.

Pinaagi sab ani, mamenus-menusan ang maritime traffic sa Mactan Channel ug may positibo kining epekto sa kinaiyahan ug sa kinabuhi sa mga lokal nga mananagat kay di na matugaw og dagkong barko matag karon ug unya ang lugar.