EDITORYAL - Nganong karon pa?

Kun kanus-a nakahuygo na ang pagtukod sa Cebu Bus Rapid Transit (CBRT) nga pwerteng dugaya nasugdan ug bisan nasugdan na daghan kaayo og aberya, murag gitak-uban na gyud hinuon kini og dag-om nga kalangitan ug nameligro pa gyud uwanon ug lunopan tungod aning bikil sa mga opisyales sa Cebu City ug sa Kapitolyo.

Hasta ang mga wala sa posisyon naningog pud unya klaro kaayong tungod kini kay hapit naman ang eleksyon, moambit gyud og tingog aron mahinumdoman ilang mga pangalan.

Una sa tanan, pila man ka tuig ni gituki ang pagtukod sa CBRT, sa pagpinangitaay palang sa pundo pwerteng dugaya nakab-ot, dayon naa pa ang mga road clearings, paghimo og mga bust stops sa kilid sa mga karsada nga karon dili sab diay mapuslan kay gihimoan gyud diha sa tungatunga og kaugalingong bus stops ang CBRT, ug daghan pang nanhitabo.

Apan wala gyuy nakahunahuna pagsusi kun kang kinsa diay nang Osmeña Blvd. gikan sa atubangan sa Capitol Grounds hangtud sa Fuente Osmeña Rotunda?

Ug karon pa sab nahibaw-an sa kadaghanan nga duna diay espesyal nga balaod nga nagdili pagguba sa katahom sa talan-awon sa Cebu Capitol Building.

Ang mga Sugbuanong yanong magbubuhis karon pa nasayod bahin niining balaora, apan sigurado nga ang mga lokal nga opisyales sa Cebu City ug sa Kapitolyo nasayod bahin niini kung wala sila nagpabaya sa ilang trabaho.

Makapahibulong kun nganong walay bisan usa nila ang nakahinumdom bahin niini atol sa planning phase palang sa CBRT, atol nga wala pa magsugod ang pisikal nga konstruksyon sa mga estraktura.

Bisan gani ang mga opisyales sa nasudnong kagamhanan nga maoy nagpasiugda aning proyektoha wala diay mahibawo aning balaura?

Wala say ni-initiate og diyalogo  aron kini hisgutan kaniadto, karon pa nga duol na ang eleksyon ug daghang gustong mosalida. Karon pa nga nakahuygo na ang pagtrabaho.

Mahimong sakto pareho ang isi’g ka habig, ang Cebu City pinangulohan ni Mayor Michael Rama ug ang Capitol pinangulohan ni Gob. Gwendolyn Garcia bahin aning CBRT, apan kadto rqa gyud untang gikwestyon nga lugar maoy hunongon ug dili ang tibuok CBRT project.

Kamong mga botante, timan-i nga kining nahitabo sa CBRT. Tungod sa pagsalidahay, apektado ang mga benepisyo ug kaayohang mahatag aning maong proyekto nga para sa tanan.