EDITORYAL - Palaro angay'ng pangandaman

Gipangandaman og maayo sa Cebu City ang umaabot nga Palarong Pambansa nga mahitabo karong tuiga diin gipaabot nga liboan ka mga atleta gikan sa nagkalainlaing rehiyon sa nasud ang magabot dinhi aron magkompetensiya sa paugnat sa kusog sa nagkalain-laing disiplina. Ang Cebu City karon pa balik mo-host sa maong kinadak-ang kompetisyon sa paugnat sa kusog sa nasud. Dinhi magagikan ang halos tanang atleta sa nasud nga ipadala sa SEA Games, Asian Games ug Olympics.

Ang Cebu City nigahin og P205 milyones para sa maong palaro. Gamiton kini para sa pagpaayo, pagbuhat og dugang pasilidad, ug pagpanindot sa mga sporting venues para masiguro nga luwas ug hapsay nga duwa sa mga atleta, pagpalit og mga sporting gears ug ekipo kay di man tingali tanang disiplina kinahanglang “bring your own equipment and gears” kay duna man gyuy “official” nga gamit para patas tanan.

Apil na niini ang pagmuntar og mga suga sa mga venues kay ang uban sa mga kasamtangang sporting venues kuwang og mga sugang dagitab.

Apil na sab ang sleeping quarters sa mga delegado sanglit dili man tanan mahimong adto sa hotel magpuyo atol sa kompetisyon ug ilang pagkaon.

Gawas sa mga atleta ug delegado, sigurado nga dunay mga kabanay sa mga atleta nga moanhi sa Sugbu aron suportahan ang ilang mga kabataan nga moduwa.

Tungod niini, kinahanglan nga andamon sa siyudad ang tanan, apil na ang transportasyon ug ang paghatag og tukmang mga impormasyon dili lang para sa mga atleta ug delegado kondili apil nasab sa mga dumuduong ug mga molupyo sa siyudad nga tingali mabag-ohan sa pagdagsa sa mga dayo.

Ang siyudad usa ka highly urbanized city ug gibansagang Queen City of the South, mao nga makatarunganon lang gyud nga kinahanglang preparado kini sa maong kalihokan aron walay negatibong ikasulti ang mga delegado ug mga dumuduong nga gustong mosaksi. Labaw sa tanan kinahanglang ikapasigarbo sa mga Sugbuanon ang siyudad atol sa maong kalihokan tungod kay kataposang kining ni-host sa maong sporting event niadtong 1994, o 30 ka tuig na.