Nagsalimoang

Usa ka pulong ray haum paghulagway sa plano ni kanhi Presidente Rodrigo Duterte nga tigumon ang tanang lider sa Mindanao aron iduso ang  inisyatiba pagbuwag sa isla  gikan sa Pilipinas---NAGSALIMOANG!

Sa iyang kahingawa nga hingpit siyang talikdan sa pamunoan ni Presidente Ferdinand Marcos Jr. ug itugyan sa hurisdiksiyon sa International Criminal Court aron atubangon ang pasangil sa abuso sa iyang kampanya niadto batok sa illegal nga drugas, nanghulga na si Duterte nga mag-independente sila sa Mindanao.

Mura ba og siya ang nakapanag-iya sa tibuok isla. Ug ang labing kataw-anan kay naghisgot siya sa posibling tabang sa United Nations aron molampos iyang plano pagbuwag sa Mindanao gikan sa Pilipinas.

Nakalimot si kanhi presidente Duterte giunsa niya og balikas ang UN ug ang pagdumili niya pagrespito sa gahom niini dihang gisugdag lili ang iyang kampanya batok sa illegal nga drugas tungod sa pasangil sa mga paglapas sa tawhanong katungod ug ingon man extra-judicial killing.

Nakalimot siya nga atol sa iyang pamunoan migawas ang Pilipinas isip sakop sa Rome Statute kay di siya mosubmitir sa hurisdiksiyon sa ICC.

Nasuko kuno siya tungod kay ang kasamtangan nga presidente, apil na ang mga nanlabay'ng pamunoan igo lang migasto sa kwarta sa nasud ug wa gyuy umento nga nahitabo sa Pilipinas.

Nakalimot si Duterte nga unom siya ka tuig nagtungkawo sa Malacañang isip presidente.

Nganong wala man niya mahimo atol sa iyang panahon ang paglambo nga iyang giingon?

Maayo tingali atong pahinumduman si Duterte unsa ka dako ang utang iyang gibilin sa nasud human sa iyang termino.

Human na ang iyang higayon apan siya pakyas--he failed big time! Ug ang monumento sa dako niyang kapakyasan ug pagka-ilad sa mga Pilipino niya mao ang saad nga malimpiyo sa illegal nga drugas ang nasud sulod lang sa unom ka buwan.

Inay maghaling og kagubot, mas maayo nga tigumon ni Duterte iyang mga kaalyado sa politika ug sultian nga suportahan ang administrasyon aron molampos basin nalang mahitabo ang laing imposibleng pasalig sa tag baynte pesos nga kilo sa bugas!