Premyo sa Sinulog

Tungod kay wa man gyud silay nahimo aron kapugngan ang engrande'ng premyo sa Kapitolyo alang sa mga mananaog sa nilabay nga Sinulog sa Kabataan sa Lalawigan, napugos pagpahibawo si Mayor Michael Rama kagahapon nga usbawan sab sa dakbayan ang premyo alang sa mga modaog sa grand ritual showdown karong Domingo.

Sigun sa pahibawo ni Rama kagahapon, nahukman kuno sa Sinulog Foundation Inc. nga himoong P3 million ang grand prize sa Sinulog-based ug Free Interpretation categories gikan sa P1 million.

Samtang ang second prize gipun-an sab gikan sa P700,000 ngadto sa P2 million. Ang 3rd prize gihimo na nga P1.5M inay nga P500,000. Giusbawan sab gikan sa P300,000 ang 4th prize ngadto sa P1 million; ug ang 5th prize gihimong P750,000 inay nga P200,000.

Wala nay hisgot duna bay consolacion prizes sama sa gihatag sa lalawigan nga P500,000 sa mga misalmot sa Sinulog sa Kabataan sa Lalawigan niadtong miaging Domingo gawas sa P2 million nga subsidy sa matag contingent. Gipaabot na nakong daan nga mao gyud ni ang buhaton ni Rama--ang tugbangan o ba kaha palabwan pa ang premyo sa lalawigan.

Kini tungod kay salikwaot sab pamation nga mas engrande ug dako pa ang premyo sa Sinulog sa Kabataan sa Lalawigan kay sa grand showdown mismo.

Niingon si Rama nga wa pa sab sukad mahitabo nga mas dako pa ang premyo sa Sinulog sa Kabataan kay sa grand showdown.

Ang makaluluoy niining pagsunod sa syudad sa layog aron pagtagbaw sa garbo sa usa lang ka tawo mao ang mga magbubuhis.  Labihan ka dako sa kantidad nga mawala sa panudlanan sa syudad aron ibayad sa premyo tungod kay doble ang kantidad nga magasto sanglit duha man ka kategorya ang Sinulog grand showdown---Sinulog-based ug Free Interpretation.

Ug ang tibuok nga kantidad sa premyo ang syudad maoy mobayad niini. Buhis sa katawhan nga unta mahimong gamiton sa mas mahinungdanon nga serbisyo.

Konswelo unta tingali og dunay daghang  contingents labi pa ang gikan sa laing mga probinsiya nga mosalmot aron paghatag og dugang bulok sa selebrasyon.

Apan hangtod gahapon mura'g 16 ra ka contingent ang mosalmot ug sagad pa gyud nila gikan ra sa syudad sa Sugbo ug nakit-an na atol sa Sinulog sa Kabataan sa dakbayan niadtong miaging Sabado.

Ang mga contingent gikan sa probinsiya sa Sugbo una na nga gipahibawo nga di sila moapil didto sa SRP agi'g pagtamod sab sa baruganan ni Gov. Gwen Garcia kinsa buot nga adto unta himoon ang Sinulog grand showdown sa Cebu City Sports Center alang sa siguridad ug kaluwasan sa mga contingent ug sa publiko sa kinatibuk-an.