Ikakawhaag-siyam nga adlaw

Dili Kasarangang Lihok sa Yawa: Paghugpa

Sukaranang Teksto

Basaha ang Lukas 11;24-26

Pasiuna

1. Matud pang Msgr. Conrado Balducci usa ka demonologist: “Ang Paghugpa kun infestation maoy usa ka matang sa dili kasarangang kalihukan sa yawa nga nakasentro sa usa ka dapit, butang, o mga hayop.”

2. Ang matag dautang Espiritu ang buot mangangkon og teritoryo. Dinhi sa kalibutan, dako nilang kalipay nga makaangkon og teritoryo ug nga pinaagi sa mga balansayon sa atong mga katigulangan sama sa padugo, diwatahan ug halad ang mga dautang Espiritu dunay personal nga pagtuo nga sila mga dios nga gihatagan og igong pagtagad ug pagsimba sa mga tawo.

3. Adunay hinungdan kun nganong ang usa ka balay o dapit nahimong nahugpaan kun infested o haunted matud pa.

Kini mahimong naglangkob sa mga abli o ganghaan sama sa naandang mga sala nga gihimo sa nagpuyo, mga pintas nga mga panghitabo sa kagahapon, mahimong ang maong dapit kanhi nga puno sa mga kakahoyan ug gipuy-an sa mga Espiritu sa kinaiyahan kun engkanto ug uban pang mga anghel nga gilabog gikan sa langit.

Pagpalawom

Matud pang Padre Jose Francisco Syquia ang kasamtangang chief exorcist sa Archdiocese of Manila sa iyang libro nga Exorcism Encounters with the Paranormal and the Occult pp. 174-180 dunay tulo ka mga hinungdan kun nganong ang usa ka balay o dapit nahimong haunted. Naglangkob kini ning mosunod:

1. Human Parapsychological diin ang kasagarang hinungdan mao ang usa ka poultergeist nga nagpasabot og naughty spirit.

Gitawag siya og agent nga gumikan sa kusog nga psychic ability makahimo siya og usa ka telekinesis sa iyang palibot. Sa ato pa, makapalihok sa mga butang nga wala niya hikapa.

Ang maayong buhaton mao nga ilahi ang maong tawo nga gidudahan ug kun mahunong na ang mga paranormal nga mga panghitabo sa iyang pagkawala nan, nagpasabot nga ang maong tawo maoy hinungdan sa maong mga paranormal nga mga panghitabo, angayan lamang nga siya tabangan pinaagi sa mga eksperto kalabot niini lakip na niini ang mga psychiatrists.

Ingon man, himoon usab ang pagsusi basin ang maong poultergeist kasagaran batan-ong babaye nahimong biktima usab sa yawan-ong panlupig. Mahinungdanon kaayo ang doble nga paghiling sa hingtungdan.

2. Spiritual Cause kun Espirituhanong Hinungdan. Kasagaran niini mao man ang mga kalag sa mga nangamatay. Wala ta masayud nga dunay sakit ug pintas nga kagahapon ang maong dapit.

Apil na niini sila nga namatay gumikan sa hikog sa kagahapon. O dili ba kaha ang maong mga nangamatay pabiling nagpakita gumikan sa ilang dakong kawili sa dapit o butang nga sod kaayo sa ilang kasingkasing niadtong buhi pa sila.

Hinuon kasagaran sa nagpakita nga mga kalag ang nangayo lamang sa atong mga pag-ampo. Ang Standard Operating Procedure gyud unta sa dili pa himoon ang house exorcism mao man ang pagsaulog sa Santos nga Misa sa maong dapit o balay.

Kun mahanaw na ang mga panghitabong paranormal nagpasabot nga ang hinungdang espirituhanon. Ang mga santos sa atong kasaysayan dunay kasinatian sa mga kalag sama pananglit ni San Nicolas de Tolentino ug Beata Anne Emerich.

3. Preternatural-Demonic Cause labina kun ang maong dapit o balay ang gigamit sa mga balansayong occult, seances, ug nga ang nagpuyo niini dunay mga abli o ganghaan gumikan sa ilang pagkinabuhi diha sa kasal-anan.

Ang pagpadugo sa balay usa ka pagkonsagrar niini ngadto sa mga demonyo. Dugang pa, walay itom o puti nga engkanto.

Mga gipanghinginlan sila gikan sa langit ug nia sila yuta padayong nanghasi sa mga tawo.

Atong hinumdoman nga dili tinuod nga ang usa ka engkantohanon, Diwata, dwende agta ug uban pang mga espirituhanong elemento ang mahigugma sa tawo. kun ugaling sila makiglambigit kanato, tumong nila lamang ang pagpanamas tamas kanato.

Mao nga dili maayo nga kita mohalad kanila og bisan unsa ingon nga halad sa kalinaw sanglit ang paghalad alang lamang sa Dios.

Pangamuyo

Langitnon namong Amahan umari ka ug duawa ang among panimalay ug panalipdi kami gikan sa gahum sa  kangitngit. Ipadala ang imong mga Balaang Anghel aron kanamo magbantay ug manalipod ug maghatag kanamo og kalinaw.

Hinaut unta nga magpabilin ang imong panalangin alang kanamo  hangtud sa kahangturan pinaagi ni Kristo among Ginoo. Amen!

Kalihukan karong Adlawa

1. Himoang Batasan ang pabendita sa imong kwarto matag gabii sa dil ka pa matulog.

2. Batasana usab ang pagbutang og exorcised salt sa mga upat ka mga suok sa balay, mga bintana, ganghaan ug uban pa.

3. Ibutang ang mga imahen sa mga santos ug sa Mahal nga Birhen Maria ingon man ang pagbitay sa krusipiho o medalyon ni San Benito. Gitawag kini og exorcism cross o demon chasing medal.

4. Batasana usab ang makanunayong pag-ampo ingon nga pamilya ginamit ang Santos nga Rosaryo, novena sa mga Santos ug uban pa. hinumdomi the family that prays together stays together.