Wala'y naminaw sa hulga

Mipasidaan si LTFRB Chief Teofilo Guadiz III sa mga jeepney driver nga naglaraw moduyog sa transport strike nga mahimo sila’ng mag-atubang og silot lakip na ang pag-bakwi sa ilang prangkisa. Wala mabalaka sa pasidaan ang transport group nga MANIBELA ug gipasaligan usab sa LTFRB ang commuters nga dili mabalaka kay aduna’y pito kag transport groups nga dili moapil sa strike. Matag habig mipadayag ug daw paghulga sa usag-usa apan ang pangutana kon aduna ba’y naminaw. Angay hinumduman sa matag habig nga ang pagpanghulga dili epektibo ngadto sa tawo nga wala magpakabana. Muleeng!

Magbilin og mantsa

Gipanghimakak sa PAGCOR ang pasangil nga kinopya lang ang ilang bag-ong logo gikan sa online website nga “Tripper.” Tataw nga gawas sa kolor, walay kalainan ang desinyo sa logo sa PAGCOR ug sa “Tripper.” Tres milyones ang gibayad sa PAGCOR sa paghimo sa maong logo. Namahayag ang PAGCOR nga mahimo’ng gama-gama lamang ang pagpagawas sa social media sa desinyo sa logo sa “Tripper” aron mabulingan ang pangalan sa ahensya. Inay mangatarungan, angayan imbestigahan sa PAGCOR ang maong seryoso’ng alegasyon. Kay bisan ang kadudahan nga akusasyon, magbilin gihapon og malaksot nga mantsa. Madahaan!

Nagsanga ang kaugmaon

Namahayag si District Engineer Mikunug Macud sa DPWH-National Capital Region South Manila District nga ang pagbaha sa Metro Manila kon adunay pagbunok sa ulan mahimo na lang unya’ng handurawan sa tuig 2030. Technically, may sulbad ang baha; apan ang burukrasya ug pamolitka maoy makapakgang sa sulbad. Dugay na kaayo ang maong suliran ug dili angayan mangandak ang DPWH. Angay hinumduman nga nagsanga ang kaugmaon: ang buot nato’ng mahitabo ug ang gimbut-an sa kapalaran. Ug wala gayod makat-on ang tawo pagbulag sa duruha. Fezteleern!

Gihunosan pag-usab

Nakaani og suporta si Cebu City Mayor Michael Rama gikan kang Cebu Archbishop Jose Palma sa laraw sa nahauna sa pagpahi-uli sa mga karaan nga publikong sam-ang kon sementeryo ug paghimo niini nga heritage parks. Gawas sa Arsobispo, nakadawat usab ang mayor og suporta gikan sa mga pribadong sektor kabahin ni’ng maong programa. Maanindot ang katuyoan sa maong laraw sa Mayor sa dakbayan. Konkreto’ng paagi usab kini sa paghinumdum kanunay ug pagpasidungog sa atong mga minahal nga mitaliwan. Kay ginaingon baya nga “Kon hikalimtan mo na ang imong mga minahal nga mitaliwan, sama ra’g gihunosan mo sila sa ilang kinabuhi sa ika-duha’ng higayon.” Saoonz!

Dili ilegal kay daghan?

Gisikop sa kapolisan ang tulo ka babaye nga tag-iya’g tindahan didto sa Taguig ug nasakmitan usab sila’g shabu nga balor og P680,000. Giingon nga sulod sa duha na ka tuig, gihimo’ng baligyaanan og shabu ang maong tindahan. Nabuking ang ilang modus tungod kay makapahibulong man ngano ang kantidad sa yano’ng softdrinks nga baligya sa tindahan mokabat man og P 1,000 ka pesos. Mao kana’y giingon nga “bisan gidili sa kagamhanan, dili tawgon nga illegal ang negosyo kon gibuhat kini sa gatosan ka magpapatigayon.” Pagkatoytoy!