Iwit sa habal-habal
Ang habal-habal maoy ebidensiya nga ang katawhan mas kamao kay sa mga opisyal sa gobiyerno. Samtang wa pay balaod nga napasar ang Kongreso ug samtang nagpadayon pang way kahumanan nga pagtuon sa Land Transportation Franchising and Regulatory Board (LTFRB), ang katawhan nisagop ug nihimong sayon, luwas ug mapuslanon sa mga habal-habal.
Bisan nagyaya ang Kongreso ug Department of Transportation (DOTr), minilyon ka pasahero nipili sa habal-habal sa ilang inadlaw nga mga biyahe ug kaliboan ka pamilya ang nabuhi sa kita sa mga drayber ug mga negosyo nga nisakay sa habal-habal.
* * *
Gipahibawo sa LTFRB sa niaging semana nga paapilon ang dugang mga kompanya ug palapdan ang pagtuon sa ubang mga rehiyon gawas sa Metro Cebu ug Metro Manila aron masusi ang:
Epekto sa legalisasyon sa habal-habal sa kahimtang sa trapiko;
Mga lagda pagseguro sa kaluwas sa mga pasahero ug mga drayber sa habal-habal ug ubang mga motorista sa kadalanan;
Makiangayon nga plitehan aron nga dunay igong kita ang mga drayber nga di sab mabug-atan pag-ayo ang mga pasahero; ug
Kinatibuk-ang implikasyon sa pagtugot sa mga habal-habal ngadto sa nasudnong ekonomiya.
* * *
Hinaut may makahunghong sa DOTr ug Kongreso nga nahusay nang mga isyu nga ilang gi-dribol sa daghang katuigan:
Gawasnon ang operasyon sa mga habal-habal, bisan ang wa tugoti sa LTFRB, wa nay dinakpanay ug ang gidaghanon mag-agad sa aktuwal nga demanda sa mga pasahero;
Nagsabot ang mga drayber ug mga pasahero sa plitehan nga wa kinahanglanang negosyohon sa gobyerno ang taripa; ug
Wa matinuod ang gikabalak-ang pagpanligdas sa mga patayng lawas sa kadalanan ug nag-helmet ang mga naghabal-habal.
* * *
Nalikayan unta ning eskandalo, nga ang mga lagda sa gobyerno naiwit sa mga panghitabo, kon gikopya pa sa Senado ang balaudnon paglegalisar sa habal-habal ni anhing Kongresista Raul del Mar ug kanhi Kongresista Bebot Abellanosa nga gipasar sa House of Representatives niadtong 2019.
Labaw sa tanan, wa unta kinahanglanang habal-habal kon gitubag pa sa gobiyerno ang mas dinalian nga mga panginahanglan: Pagpatuman sa tinuoray nga mass transport system (sama sa na-politika nga Bus Rapid Transit sa Cebu City) ug pagpahapsay sa kadalanan aron di mokamang ang trapiko nga nakapa-alkanse sa ekonomiya og binilyon ka pesos kada adlaw.
* * *
- Latest
