Marcos dili mapugos

Ang pagtug-an ni kanhi Presidente Rodrigo Roa Duterte atol sa Unang Davao City Hakbang ng Maisug Prayer Rally, nga nakita niya ngalan ni Bongbong Marcos sa gihikyad-pakitang PDEA narcotic list sa taga PDEA niadtong Davao City mayor pa siya ug ang pagbulgar ni Ex-PDEA Agent Jonathan Morales sa mga nagsunod PDEA Leaks Senate hearing, nga siya maoy nagpreparar-himo ug mipirma sa Pre-PDEA Operations Report, diin nahiapil ang ngalan ni Bongbong Marcos Jr. sa mga dakpononong drugs user ug gikonpirmar ni Senador Bato dela Rosa nga existing ug authentic, mga lehitimong ebedinsiya kini nga bisan makapila pa tabonig pamakak ni PDEA Director General Virgilio Lazo ug iyang mga kaubanan, dili ug dili na gayod matuis.

Ilabi na, kay bisan sa masubsob panawagan sa katawhan: ‘Marcos, magpa-drug test ka na!” nagpabilin kining bungol ug igo rang mokatawa.

Isip maoy kinatas-ang lider sa Pilipinas ug maoy nanimon sa atong paglawig paingon sa unahan, importante bayang isumiter iyang kaugalingon alang sa usa ka lehitimo-honest nga drug test aron kon unsa man ang resulta, masayran kon angayan pa ba iyang physical, spiritual and mental condition sa iyang padayon nga pagpangalagad?

Apan unsa bay gibuhat ni PBBM? Tanang kalihokan sama sa mga malinawong Maisog Rally, pro-good-governance vloggers ug PDEA Leaks Senate hearing nga maghisgot-sugyot bahin niini ug unsa ka importante ang magpa-drug test, gipangitaan niyag paagi nga magurgur-mapugngan-mahunong.

Kon ang napalagpot nga Fedinand E. Marcos Sr. walay kukaluoy nga mipasipala-nanamastamas sa atong freedom of speech, of press and of expression panahon sa Martial Law, mas grabe kining gibuhat sa Jr. Kay kon ang mainstream media mobalitag maot binuhatan sa administrasiyong Marcos, kini gukdon-piiton-ipasira sama sa gidangatan sa SMNI.

Subo kaayo palandungon ang kataposang linya sa Nasodnong Awit nga gibilin sa atong mga bayani:

“Aming ligaya na pag may mang-aapi, ang mamatay nang dahil sa iyo.”

Kay samtang sila nagmalamposong nakigkombati-nagpakamatay batok sa nagkalainlaing langyaw nga gustong modominar sa atong nasod hangtod naangkon tang kagawasan, ang pagpamunoan karon, namatikdang maoy miunay pagpatay sa atong kagawasan. Ug sila pay gidapigan sa atong kasundalohan ug kapolisan. Teka, wala ba diay labot sa inyong pagpanalipod, AFP ug PNP, ang katawhang maoy nagsuweldo ninyong tanan?