12 anyos na

Miabot na og 12 ka tuig ang edad sa TAMA, INC. - Tabang Alang sa Maayong Alagad, Inc., usa ka kahugpongan sa mga kabus sa Barangay Quiot ning dakbayan sa Sugbo nga nagtinabangay aron makuhaan og gamay ang kagolanan sa mga kauban niini nga namatyan o mamatyan.

Ang mga sakop sa TAMA, INC. mag-amotay kada adunay sakop niini o benepisyaryo sa sakop nga mamatay. Ang sakop nga mamatyan makadawat og lima ka libo ka pesos isip tabang pinansiyal. Gawas niini, aduna usab silay madawat nga bugas kada higayon nga kini magtigom.

Gipaligon sa TAMA, Inc. ang boluntarismo ug ang hiyas sa pagtinabangay alang sa iyang isigkatawo.  Gidasig sa kahugpongan ang boluntaryo nga pagtabang ug pagtinabangay isip kataposan nga panagang sa mga panahon nga ang tawo wala gayoy makoot tungod sa kahimtang sa iyang kakabus ug kalisod.

Sa iyang pagkahimugso nakakuha kini og legal nga personalidad tungod kay rehistrado man kini sa Securities and Exchange Commission (SEC).

Niadtong Mayo 25 sa alas 5:00 sa hapon gipahigayon sa TAMA, Inc. ang iya usab nga ika 12 ka tuig nga panagtigom sa Quiot Proper Open Court, Barangay Quiot ning dakbayan sa Sugbo. Ang tigom gitambongan nila ni Cebu City South District Congressman Edu Rama, Cebu City Councilor Francis Esparis ug Quiot Barangay Captain Danny Teves.

Tugoti nga akong pasalamatan ang akong mga higala nga walay paglubad sa ilang pagsuporta sa kahugpongan sa mga kabus sa Barangay Quiot.

Itunol nako ang dako nakong pasalamat ngadto nila ni Congressman Edu Rama, Mayor Mike Rama, Acting Mayor Raymond Alvin Garcia, Mr. Israel Alin sa Alin Customs Brokerage and Goup of Companies, City Councilors Francis Esparis, Rey Gealon ug Joy Pesquera, Mr. Richard Rodrigues sa Royal Colleges of Science and Management ug Quiot Barangay Council.