Gipapas ang utang

Gilagdaan na ni Presidente Marcos, Jr. ang balaod nga nagpapas sa utang sa 600,000 ka mga mag-uuma sa tibuok nasud nga mokabat og P57.65 billion. Kabahin ang maong lakang sa paningkamot sa presidente pagpausbaw ug pag-moderno sa sektor sa agrikultura.  Ang utang sa mga mag-uuma nahisama sa usa ka yogo nga gipas-an sa matag adlaw ug giingon nga usa sa labing dako nga hulga sa kalambuan sa atong sektor sa agrikultura. Ang pagpapas niini sa presidente dakong alibyo sa mga mag-uuma. Kay ginaingon baya nga “Mas maayo pa’ng matulog nga walay panihapon kay sa mobangon nga utangan.”  Fezteleern!

Dili moabante

Mipadayag sa ilang suporta ang mga leader sa lokal nga mga tourism stakeholders sa Sugbo ug Mandaue City sa gisagop nga labing bag-ong slogan sa DOT nga “Love the Philippines” human sa kontrobersiya nga nasinati niini.  Wala matino sa balita kon aduna ba’y mga tourism stakeholders sa laing lugar o probinsya ang mipadayag sa ilang suporta sa DOT.  Mora’g nag-alsa lang kita sa atong kaugalingon’g lingkoranan niini’ng kahimtanga. Angay tamdan ang panultihon nga, “Dili ka gayod moabante sa unahan kon ikaw ra mismo ang magpikpik sa imong abaga.” Pagkasipsip!

Unsay angay buhisan?

Alang kang Senador Raffy Tulfo, mas angayan nga patas-an ang buhis nga gi-imponer sa National Grid Corporation of the Philippines (NGCP) kay sa mag-imponer og bag-ong bulohisan ngadto sa mga junk foods labi nga kini maoy naandan’g pagkaon sa mga kabos. Dugang pa sa senador nga gibahinbahin lang ang binilyon nga ginansiya sa NGCP isip dibedendo. Ginaingon nga ang pag-imponer og buhis sa kabos nahasupak sa paningkamot nga tabangan ang katawhan nga mahaw-as sa kakabos. Apan ginaingon usab nga kon buhisan nimo ang ginansya, sama ra nga gibuhisan mo usab ang kalampusan. Isip-isip!

Supakon ang kinaiyahan

Gikataho nga ang panginahanglan sa karne’ng manok ug itlog mikunhod taliwala sa pagsaka sa presyo sa bugas.  Unahon na lang sa mga konsumidor ang pagpalit sa bugas inay sa mga produktong karne.  Sa kasamtangan, naghinobra ang suplay sa manok ug itlog apan taas gihapon ang presyo tungod kay mamawi man ang mga tindera sa kahinay sa halin.  Wala diay mosalir ang “law of supply and demand” kay taas man ang presyo bisan diyotay ang panginahanglan. Mao kana’y giingon nga, “Supakon man gani sa tawo ang balaod sa kinaiyahan, balaod pa kaha sa kagamhanan ang dili matamakan.”  Madahaan!

Sakay-sakay sa isyu

Andam na ang Police Regional Office-7 nga mosang-at og kaso niadtong namunit sa kwarta nga nangatagak didto sa SRP apan wala mouli niini ngadto sa tag-iya.  Pagpangawat ang kaso nga ipasaka subay sa Article 308 sa Revised Penal Code.  Sakay-sakay ra man ang kapolisan sa kahumot sa maong isyu. Malisod pa ang pag-ila sa mga wala manguli sa kwarta busa kadudahan ang kaandam sa kapolisan pagpasaka sa kaso. Ginaingon nga “Sa mga bugirit, mas dali ang pagsulti kay sa pagbuhat.”  Apan dili hinuon pagpanghambog kon mabuhat mo ang imong gipamulong.  Atangan!