EDITORYAL - Di gusto og peacetalks

Dunay punto ang bag-ong gitudlong kalihim sa Department of National Defense nga si Gilberto “Gibo” Teodoro Jr. sa pagpadayag nga wala sila makauyon sa pagpahigayon og mga peace talks sa mga rebelde.

Kini tungod kay tinuod man nga bisan unsang orasa mahimong moadto ang si bisan kinsang rebelde, komunista man o terorista, sa mga kampo sa militar o kapolisan sa ilang mga lugar ug motahan ug manumpang mobalik na sa sabakan sa gobiyerno.

Gawas pa, makadaghang higayon nga gisuwayan sa nakalabay nga mga administrasyon sa gobiyerno sa Pilipinas nga nakigsabot alang sa kalinaw uban sa mga rebeldeng komunista, partikular ang Communist Party of the Philippines-New People’s Army-National Democratic Front, apan pulos kini napakyas.

Apan sa nanglabay nga mga katuigan, nabantayan nga sa kadugayan ang mga rebeldeng NPA hinayhinay ng nabungkag ug nagkahinay sa kabukiran tungod daghan na kanila ang napatay, duna say daghang nitahan sa gobiyerno.

Milampos usab ang gobiyerno sa pagkombinsir sa daghang mga kaniadto “masa” nga patago nga nagsuporta sa kalihokan sa NPA, pinaagi sa pagbubo og pundo sa mga hilit nga lugar, pagpalambo sa mga karsada, agrikultura, linya sa kuryente, komunikasyon, health centers, patubig, edukasyon ug daghan pang uban.

Gawas pa niini, daghan na sa mga impluwensiyadong mga lider sa CPP-NPA-NDF ang nakalas o namatay sama nilang Jose Maria Sison, magtiayong Tiamzon, ug mga tag-as nga lider sa armadong kalihokan sa nagkalain-laing guerilla fronts sa NPA.

Dako sab og kalamposan ang nahimo sa National Task Force to End Local Communist Armed Conflict (NTFELCAC) nga mikonsiderar sa insurhensiya isip lokal nga problema ug sulbaron kini diha sa lokal nga settings maong daghan ang nitahan sa mga rebelde.

Hinuon kwestyonable ang pipila ka mga gihimo sa NTFELCAC tungod sa isyu sa red-tagging o ang pagpamasangil bisan sa mga nag-adbokasiya sa pagtahod sa tawhanong katungod gikonsiderar na nilang rebelde o kaaway sa gobiyerno.

Wala hinuon mokontra si Teodoro sa kasamtangang sistema. Nakita tingali niya nga bisan sa unsa pang paagi, basta mahunong lang ang insurhensiya sa labing daling panahon, mas maayo.