Sa dihang naguba ang LCD sa akong cellphone

Guola hinuon nako sa dihang nakamatikod ko nga dili na maka-detect sa akong fingerprint ang akong cellphone. Dunay manawag dili ko makatubag. Dunay text dili ko maka reply. Hinuon napawong ang akong data mao nga wala mag-expect na lang pud nga dunay chat.

Nahitabo kini sa dihang nagpahigayon kami sa naandang enthronement activities sa Alliance of the Two Hearts ug sa Barangay sa Birhen. Hangtud na lang sa pagka gabii niadtong tungora wala gyud ko mahimutang.

Salamat na lang gyud kay pinaagi sa kahanas sa akong amigo nga si Kaloy naayo ra gyud ang akong cellphone. Nagpusot pusot ang mga texts ug messeges sa messenger apan daklit ra tungod kay nibanos ang kalinaw. Tungod kay nagbisyo walay signal ang Sun.

Sa akong pagpamalandong akong nahatagan og espirituhanong kahulogan kining maong panghitabo.

1. Una, tingali tungod sa tinguha nga daghang mga buhat ang mahimo sulod lamang sa usa ka panahon o higayon, mao nga gipahigmata ako sa kahigayonan nga kinahanglang gyud ang pokus. Ang principle of non-contradiction nagkanayon: “It is impossible for a thing to be and not to be at the same time at the same place.” Sa hinay hinay mabuhat gyud ang tanan. May kaugalingong panahon ang matag takna.

2. Ikaduha, Nahimong distant ang akong kaugalingon sa kasamtangan. Na attach ko sa gadget bisan pa man kun naggunit ako sa akong rosaryohan.

3. Ikatulo, kon dili kita grounded sa reyalidad mamahimong malisud ang panaw padulong sa gitinguhang integrasyon. Sama sa pag-ampo gud. Kun sayop ang atong panlantaw niini nan, malisud ang pahimo niini nga husto ug sakto.

Naayo man tuod ang LCD sa akong cellphone, apan padayong nikutaw sa akong alimpatakan ang pangutana: Timailhan ba kaha kini aron mas paladman ko pa ang bisan unsang yano kay lagi ang technological advancement dili garantiya nga nindot ang atong komunikasyon.