Nalinga sa Maharlika

Unom pa lang ka buwan sukad sa katapusang umento sa suholan nga gipatuman sa Regional Tripartite Wages ang Productivity Board (RTWPB) dinhi sa Central Visayas apan naglaraw na sab ang ubang kahugpongan sa mga mamumuo nga mangayo og laing usbaw sa sweldo.

Ang Partido Manggagawa (PM) gikatakdang moduso og laing petition for wage hike sunod semana. Plano nilang mangayo og P95 hangtud sa P100 nga umento sa inadlaw nga sweldo aron lang makatapak sa epekto sa kamahal sa mga nag-unang palaliton.

Sigun sa PM nga ang P31 nga umento sa sweldo  nga gipatuman sugod niadtong Hunyo 14 gilamoy ra sa pagsaka sa mga palitonon ug umento sa pletihan tungod sa kamahal sa krudo ug gasolina.

Ubos sa lagda dili mahimong mangayo og umento sa suholan sulod sa usa ka tuig gikan sa katapusang wage order nga gipagawas sa RTWPB gawas lang kun dunay mga supervening condition.

Alang sa mga opisyal ug sakop sa PM,  ang kataas sa inflation rate sa nasud tungod sa kamahal sa mga produktong petrolyo maisip na nga supervening condition.

Sigun sa labing awahi nga datus, ang inflation rate sa nasud niadtong Nobyembre miabot na og 8 porsiyento.

* * *

Samtang nagkapuliki ang mga kabus unsaon pagsagang ang epekto sa inflation, ang mga opisyal sa nasudnong kagamhanan mas migahin og panahon sa pagtukod og Maharlika Investment Fund Corporation kang kansang pundo adto kuhaon ang dakong bahin sa pension fund sa mga anak sa singot pinaagi sa SSS ug GSIS.

Inay tutokan ang pagpangita og pamaagi unsaon nga maminusan ang inflation ug ang epekto niini sa mga kabus nga pamilya mas nalinga ang mga opisyal sa nasud sa kwestiyonable nga katukuran sa wealth fund.

Nagsalig ang mga kanahan nga bisan pa og mosangko sa langit ang pagsaka sa inflation rate di magutman ang ilang pamilya.

Apan unsaon naman lang ang mga kabus nga pamilya nga nagsalig sa ilang sweldo? Tungod sa kataas sa presyo sa mga baligya wala nay hapit kalag ang sweldo sa ordinaryong mga trabahante.

Kini maoy angayang unahon pag-atiman sa mga opisyal ta inay ang Maharlika investment fund nga klarong gidesinyo alang sa personal interest sa pipila ka mga tawo nga anaa sa gahom.

Gawas nga kadudahan ang motibo naghatag sab ni og dakong peligro nga mahanaw ang kwarta alang sa benepisyo sa         mga membro sa GSIS ug SSS.

Wala pay labot niini ang dakong posibilidad nga gamiton sa mga buaya sa gobyerno ang maong investment corporation aron limpiyohan ang ilang mga kinawat nga kwarta.