Kakapoy ug kalaay

Dunay mga higayon nga anaa gyud ang kakapoy inubanan ang kalaay. Ang kakapoy nga mokalit lamang og sakdap sa higayon nga anaa ka na unta taliwala sa usa ka makugihong panlimbasog alang sa usa ka kawsa. Ug kun mohugpa na ang kakapoy mosunod pud dayon ang kalaay. Si bisan kinsa ang mahimong mahiagum niini. Si bisan kinsa ang mamahimong mataptan niini. Usa ka adlaw niana, mahinangpon akong nangandam alang sa pagahimong pagduaw sa usa panimalay segun sa naandan. Human makailis nagpaabot ako. Niabot na lang ang hapon wala gyuy nikuha. Ingon ini usahay ang kinabuhi. Mamahimong ma fall short ang imong expectation. Lahi ang anaa sa imong hunahuna ug lahi ang mahitabo. Ang bugtong paagi aron imong matagamtaman ang kalinaw mao man ang pagdawat nga dunay mga higayon nga kita pakyas sa atong gilauman. Anaa ang kakapoy apan wala kini magpasabot og pagpaawot na lamang sa dakong kapildihan. Ang kalaay moabot labina kun mahanaw na ang kadasig. Daghang mga hinungdan kun nganong ang usa ka tawo laayon. Kini naglangkob nining mosunod:

1. Kun ang iyang kahago dili matupngan sa bawos nga pagtagad sa mga gihagoan. Sama gud na sa usa ka bana nga kapoy kaayo sa trabaho apan inig uli sa balay ang asawa wala gani makapanghinlo sa pinuy-anan.

2. Kun dunay mga tawo nga padayong mopakita sa ilang dayag nga pagsupak sa imong pamaagi. Mga tawo nga misupak apan wala gani ikatampo.

3. Kun bug-at na kaayo ang responsibilidad nga gisangon ug bugtong ang hingtungdan lamang ang naningkamot. Kini tungod kay nagdumili pagsabot sa kahimtang ang mga tawong nagpalibot. Ako mismo bation man sa ingon apan kanunay lang gyud ko nga nagtuo nga dunay bangaw human sa unos. Ug labaw sa tanan dunay katapusan ang tanan lakip na ang atong suliran.