Masarap inomin, lasa’ng ovaltine

Miani og nagkadaiyang reaksyon ang giumol karon ni Mayor Edgar Labella nga Mayor’s Information and Liaison Officer (MILO) diha sa matag barangay.  Adunay kapitan nga misuporta ug adunay kapitan usab nga misaway kay illegal kuno ang maong lakang.  Nakapahinumdom kini sa giingon nga commercial sa usa ka energy drink nga may susamang pangalan.  Sa dihang gilitok na sa inilang endorser ang mga pulong-pagdayeg sa maong produkto, dakong baligho ang nahitabo kay mao man kini ang iyang nasulti: “MILO-Masarap Inomin, Lasa’ng Ovaltine”. Pagkatoytoy!

Tricycle out, angkas in

Sa tuyo nga makontrolar ang pagdagsang sa mga tricycle sa kadalanan, labi na kadtong walay prangkisa, ang kagamhanan sa dakbayan sa Lapu-lapu nagdili na karon sa pagpataud sa mga sidecar sa mga motorsiklo.  Kon wala na’y tricycle, mahimong molipang ang Angkas ug habal-habal isip hulip nga matang sa transportasyon.  Dili lang diay sa duwa nga basketball ang adunay substitution, apil sab diay sa pampublikong sakyanan.  Na hala, “TRICYCLE OUT, ANGKAS IN”.  Hala no!

Nagtapat ug nagabasol

Segun sa balita, gidakop sa kapolisan ang usa ka 39 anyos nga maestra human siya isumbong sa usa ka inahan tungod sa pagkumot kuno sa maong maestra sa nawong sa iyang  4-anyos nga anak.  Ang rason sa pagkumot mao nga nasuko ang maestra nga wala makatubag sa iyang pangutana ang bata.  Sa gidangatan karon sa maestra, atol niining panahon sa kwaresma, makaayo tingale kaniya nga mangayo ug pasaylo ubanan sa pag-awit nga nagkanayon: “Nagtapat na ako ug nagabasol”.  Hinaut usab nga dili siya tubagon sa inahan sa pag-ingon: Madahaaaan!

Sayop tingale ang focus

Adunay mokabat 300 ka empleyado sa Philippine Airlines (PAL) ang natangtang sa ilang trabaho kabahin sa business restructuring sa kompaniya taliwala sa mga limitasyon sa pagbiyahe tungod sa kahadlok sa pagkuyanap sa corona virus disease (Covid-19).  Dinhi sa Pilipinans, mas daghan na man hinoon ang nawad-an og panginabuhian kay sa nataptan sa sakit nga dala sa Corona virus.  Dili ba kaha sayop ang focus sa atong mga tinugyanan sa kagamhanan? Isip-isip!