Daghang salamat, Sir Sam!

Naila siya sa bansag nga “emcee for all season” tungod sa talagsaon niyang talento.

Sa bisan unsang dagkong okasyon sa Sugbo imposibling dili nimo mabati ang tingog ni Sam Costanilla isip host. Gani gihulagway siya ni Konsehal Dave Tumulak nga maoy tingog sa Sinulog sa Sugbo.

Apan luyo sa iyang kabanggiitan nga “host” nagpabilin siyang yano ug mapaubsanon. Wala gyud bisan kanus-a mosulod sa iyang ulo ang iyang kabantugan. Nagpabilin siyang mahigalaon ug maabi-abihon bisan ngadto sa mga batan-on niya nga mga kauban sa industriya sa media.

Gani diha’y usa ka higayon nga nangahas ko pag-imbitar niya isip “host” sa simpleng kasaulogan sa adlaw’ng natawhan sa akong unica hija tulo o upat ka tuig na ang milabay. Bisan sa iyang ka-busy wala ko niya balibari.

Una nakong nahimamat si Sir Sam didto sa dyLA samtang siya nag-alagad pa isip program director samtang ako nagsilbi  isip police reporter sa maong sibyaanan. Nahimo siyang personal nga higala sa mga reporter tungod kay siya buotan ug andam mopaambit sa iyang kinaadman.

Sa makadaghang higayon nagsilbi siya namo nga lecturer sa matag-semana nga news clinic nga gipasiugdahan kaniadto sa kanhi general manager sa dyLA nga si anhing Secretary Cerge Remonde. Wala maputol ang among panaghigala ni Sir Sam bisan siya mibiya na sa dyLA tungod kay nagsilbi gihapon siya nakong usa sa mga tinubdan sa balita isip public information officer sa Kapitolyo panahon sa administrasyon ni kanhi gobernador Pablo Garcia.

Dugay ko’ng nibangon gahapon tungod sa hilanat ug ubo nga akong nasinati sa milabay’ng tulo na kaadlaw. Apan misamot ang kabug-at sa akong pamati dihang nasayran ang pagtaliwan ni Sir Sam nga personal ko nga giisip nga higala ug magtutudlo.

Wala pay klaro unsay hinungdan sa iyang kamatayon, apan sigun sa mga pasiunang kasayuran. Nakit-an ang iyang sakyanan nga miparada sa kilid sa annex building sa barangay hall sa Inayawan niadtong Biyernes sa buntag ug wala na siya mogawas. Giingong gikan siya sa iyang newscast sa sibyaan dyCM diin siya nagsilbi isip station manager. Nadiskobrehan ang iyang patay’ng lawas gahapon sa buntag sulod sa iyang kotse.

Maayong pagpanaw, Sir Sam!  Daghang salamat sa kahigayonan nga ikaw mahimamat makauban sa trabaho. Daghan usab kaayong salamat samga pagtulon-an nga imong gipaambit ug labaw sa tanan sa mga pahiyom, katawa, talidhay ug bahakhak uban sa imong mga pasiaw.