Batan-on pa, apan tampalasan na

Usa ka serye sa mga kagubot nga naglambigit sa mga menor de edad ang nagpadayon nga nahitabo, ilabi na sa dakbayan sa Sugbo. Lakip na niini ang paglinabayay og botelya sa duha ka grupo sa mga bata sa Barangay Tejero, ingon man ang pagpanagmal sa usa ka grupo sa mga batan-on ngadto sa usa ka menor de edad nga naglingkod ra sa daplin sa dalan sa Barangay Cogon Pardo.

Gihulagway kini sa usa ka opisyal gikan sa Department of Social Welfare Services (DSWS) nga usa ka makatugaw nga kahimtang.

Makapabalaka gyud nga sa hilabihan pa kalinghod sa ilang pangidaron, makahimo na sila sa pagpanakit sa ilang isigkatawo.

Asa na man diay ang ilang mga ginikanan, ug ngano nga anaa man gihapon sa karsada kining mga bataa sa tunga sa kagabhion? Duna may ordinansa sa curfew, busa giunsa man nila pagkahimo nga makalusot gihapon?

Tungod kay nahimo na man silang hilabihan kagahi og ulo, ilang gihimo ang bisan unsa nga ilang mahahuna-hunaan. Sa matag pamilya, nagkinahanglan og mga lagda nga kinahanglang sundon sa matag sakop, ilabi na ang estriktong pagdili sa mga bata nga maglaroy-laroy sa gawas kon gabii na.

Apan napakyas ang pipila ka mga ginikanan tungod kay sila mismo walay disiplina—puliki sa pagdula og online games—samtang ang uban wala na gayoy pakadabangan sa ilang mga anak.

Kon gipahigpitan pa lang sa matag panimalay ang pagdili sa paggawas sa mga menor de edad, dili na unta ingon niana kabug-at ang pagbantay sa mga opisyal sa barangay ug apil sa kapolisan; kon ugaling may makalusot man, gamay na lamang kini.

Sa mga tanod sa barangay, nagpatrolya sila sa palibot, apan ang mga batan-on mao na hinuon ang nagsubay sa ilang mga lihok. Sa oras nga molihok na gani ang mga tanod palayo, mobalik na usab sila sa paghimo sa ilang mga gusto.

Kon maghisgot kita bahin sa mga seryosong isyu nga naglambigit sa mga bata, ang mga insidente sa pagpamusil sulod sa mga tulunghaan ang usa sa labing bug-at ug kontrobersyal.

Kon mahimo nila kini sulod sa usa ka sirado nga dapit nga gipanalipdan pa sa mga security guard, dili layo ang posibilidad nga mahimo usab nila kini sa gawas sa eskwelahan—tungod lamang kay dili nila mapugngan ang kainit sa ilang kasuko nga kinahanglan nilang ipagawas.

Moundang na lang ba sa pagpaniid ug pag-follow up lamang ang mga gitahod nga ahensiya sa kagamhanan, samtang naghulat nga mas mograbe pa ang sitwasyon sa matag pag-agpas sa kasungayan niining mga batan-on nga mahilig sa kagubot?

Tungod kay dili man sila daling magukod sa balaod isip mga menor de edad, mas nag-anam sila kagahi, ug ang sangpotanan mao ang pagkakalas sa mga inosenteng kinabuhi tungod sa ilang mga binuhatan—batan-on pa sa pangidaron, apan talamayon na. Mahimong dili nila dawaton kining maong hait nga paghulagway tungod kay gipanalipdan sila sa balaod isip mga menor de edad, apan kini ang pait ug masakit nga kamatuoran.