Labaw pa sa binata

Sa wala pa hingpit mobiya sa Cebu City hall si kanhi Mayor Tomas Osmeña gipaneguro niya nga dili gyud magamit sa bag-ong mayor Edgardo Labella ang opisina nga iyang gibiyaan.

Abi nako nga ang mga butang lang nga pwede bitbiton o balhinon ang gipangkuha,apan dihang niadto for coverage murag nalusno ko sa akong nasaksihan.

Dili ko katoo nga ang buhatan nga simbolo sa gahum sa katawhan sa dakbayan sa Sugbo nahimong sama sa dapit diin nahitabo ang kagubot, murag gimasaker.

Wala lang ko maanad nga ang opisina nga kanhi nindot tan-awon diin didto manginterview ang media atol sa presscon uban sa mayor, nagusbat na.

Mas dili gyud katoohan nga ang mayor nga kanhi naglingkod sa maong buhatan ang nag guba sa opisina nga nahimong kabahin sa iyang kinabuhi ug sa mga Sugboanon.

Dili ikalimod nga usa si Mayor Tomas Osmeña sa lig-on nga lider sa dakbayan, malantip ang salabotan, dunay baruganan ug  dunay mga proyekto nga motatak gyud bisan og mawala na siya sa gahum sama sa SRP.

Estrikto ug arogante, what you see is what you get o dili plastik kinsa kun masuko daw dulot sa bukog nga nawongon gyud ka og kasaba, insultohon pa gani.

Ning pabiya niya sa gahum foul kaayo or extreme ang iyang kabilin nga gihimo nga mao ang distruction sa seat of power symbol sa city government.

Bisan pa og siya ang nigasto sa pagpanindot sa opisina, minilyon ang iyang nagasto dili gyud unta angayan nga panitan ang buhatan.

Mahimo ra niyang kuhaon kadtong pwedeng mabitbot apan kadtong tiles, kisame, inidoro ug uban pa gibarato nalang unta to niya sa mosunod nga mogamit sa buhatan.

Labaw pa sa binata ang iyang gihimo kay ang bata dili man mangguba seguro sa play house, seguro ang ubang mga duwaan maoy pangkuhaon.

Anugon nga ang mga dagkong nahimo ni Osmeña sa iyang pagdumala sa dakbayan namantsahan sa walay kaposlanan nga binuhatan.

Seguro only in Cebu nga ang napildeng mayor nangunay sa paghimulbol sa buhatan nga iyang gibiyaan.